Ahmet Baıtursynuly atyndaǵy Qostanaı óńirlik ýnıversıtetiniń bazasynda ınjenerlik bilim berý salasyndaǵy oqý-ádistemelik birlestiktiń keńeıtilgen kóshpeli otyrysy ótti. Is-shara taqyryby – «Injınırıng 4.0: strategııalar, ózekti máseleler jáne seriktestik».
Jıynǵa Qazaqstan Respýblıkasy Ǵylym jáne joǵary bilim mınıstrliginiń ókilderi, JOO-nyń mamandary, ındýstrııalyq jáne sheteldik seriktester, sondaı-aq oqý-ádistemelik birlestiktiń músheleri qatysty.
Is-shara aralas formatta ótti: 80-nen astam qatysýshy ýnıversıtet bazasyndaǵy óńirlik Smart-ortalyqta jáne ındýstrııalyq seriktesterdiń (Allur, Kia Qazaqstan, KamLIT KZ jáne AgromashHoldıng) alańdarynda oflaın qatysty. Sonymen qatar 70-ten astam qatysýshy onlaın qosyldy, bul format sheteldik ókilderdiń qatysýyn qamtamasyz etti.
Keńeıtilgen otyrystyń basty maqsaty – ınjenerlik bilim berý salasyndaǵy jańa strategııalardy talqylaý, Injınırıng 4.0 dáýiriniń ózekti máselelerine den qoıý jáne áriptestik qatynastardy nyǵaıtý.
Alǵy sóz sóılegender: Ahmet Baıtursynuly atyndaǵy QО́Ý rektory Seıtbek Qýanyshbaev, QR Joǵary jáne joǵary oqý ornynan keıingi bilim komıteti tóraǵasynyń orynbasary Gúljan Jarasova, Ábilqas Saǵynov atyndaǵy QTÝ rektory Sáýle Saǵyntaeva jáne Qostanaı oblysy ákimdiginiń qoǵamdyq damý basqarmasy basshysynyń orynbasary Qaırat Qazez.
Plenarlyq otyrys aıasynda ınjenerlik kadrlardy daıarlaý máseleleri, ýnıversıtet pen ónerkásiptik kásiporyndar arasyndaǵy tıimdi yntymaqtastyq formalary, sondaı-aq Qazaqstandaǵy ınjenerlik bilim berýdiń ulttyq modelin iske asyrý máseleleri qaraldy.
Ýnıversıtetterdiń ındýstrııalyq seriktestermen ózara árekettestigi, dýaldy bilim berýdi damytý jáne ýnıversıtetter bazasynda ozyq ınjenerlik mektepterdi (BES) qurý máselelerine erekshe kóńil bólindi. Allur kompanııasy tobynyń ókili Aıgúl Ahmetova ındýstrııalyq ózekti máselelerge qarsy turý tájirıbesimen bólisip, ýnıversıtettermen birlesken bilim berý baǵdarlamalarynyń mańyzdylyǵyna, dýaldy oqytýdy engizýge jáne kadrlyq strategııalardy ázirleýge joǵary oqý oryndarynyń qatysýyna nazar aýdardy.
Kia Qazaqstan jáne KamLIT KZ kompanııalarynyń ókilderi óz baıandamalarynda ınjenerlik bilim berýdi damytýdyń negizgi baǵyttaryna toqtalyp, sonyń ishinde sıfrlyq tehnologııalardy belsendi engizý, halyqaralyq yntymaqtastyqty keńeıtý jáne túlekterdiń básekege qabilettiligin arttyrý máselelerin atap ótti.
Stýdentterge transulttyq korporasııalarda suranysqa ıe ózekti ınjenerlik quzyretterdi qalyptastyrýǵa erekshe mán berildi. Sheteldik joǵary oqý oryndarymen akademııalyq yntymaqtastyqty keńeıtý jáne joǵary tehnologııalyq salalardyń talaptaryna barynsha beıimdelgen bilim berý baǵdarlamalaryn ázirleý bastamalary tanystyryldy. Bul rette teorııalyq bilimdi óndiristik tájirıbemen ushtastyrýǵa múmkindik beretin tıimdi qural retinde dýaldy oqytýǵa basymdyq berildi.
Kúnniń ekinshi jartysynda «BES Connect: tehnologııalyq dıalog kúni» kommýnıkasııalyq alańy ótti. Qatysýshylar zaýyttardy aralap, óndiristik ozyq tehnologııalarmen tanysty. Allur, KamLIT KZ jáne AgromashHoldıng kompanııalary zamanaýı materıaldardy engizý, óndiristik prosesterdi ońtaılandyrý jáne ınjenerlik mamandardyń biliktiligin arttyrýdyń mańyzdylyǵyna nazar aýdara otyryp, ózderiniń eń jańa ázirlemeleri men sheshimderin usyndy.
Is-shara qorytyndysy boıynsha tehnologııalyq baǵyttaǵy salalarǵa arnalǵan joǵary bilikti ınjener mamandaryn daıarlaýǵa baǵyttalǵan birlesken bastamalardy odan ári damytý týraly kelisimderge qol jetkizildi.