Jetisý oblysynda kórnekti jazýshy, memleket jáne qoǵam qaıratkeri Ánýar Álimjanovtyń 95 jyldyǵyna arnalǵan saltanatty is-shara ótti. Alakól aýdany, Qabanbaı aýylynda uıymdastyrylǵan mereıtoılyq sharaǵa Jetisý oblysynyń ákimi Beıbit Isabaev, Májilis depýtaty Erlan Saırov, aqyn Ulyqbek Esdáýlet, ǵalymdar men qalamgerler qatysty, dep habarlaıdy Egemen.kz.
Is-shara jazýshynyń bıýstine gúl shoqtaryn qoıýmen bastalyp, keıin aýyldyq mádenıet úıinde «Álemge áıgili Ánýar» atty respýblıkalyq ǵylymı-tanymdyq konferensııamen jalǵasty. Mádenıet úıinde jazýshynyń shyǵarmashylyǵyna arnalǵan kórme uıymdastyrylyp, arnaıy beınefılm kórsetildi.
Oblys ákimi Beıbit Isabaev Memleket basshysy Qasym-Jomart Toqaevtyń mereıtoıǵa arnaǵan quttyqtaý hatyn oqydy. Prezıdent óz hatynda Ánýar Álimjanovty qazaq rýhanııatynda erekshe orny bar, adamgershilik pen halyqtar dostyǵy taqyryptaryn tereń kótere bilgen jazýshy retinde baǵalap, onyń ádebı jáne qoǵamdyq qyzmetine joǵary baǵa berdi.
Konferensııada jazýshynyń ómiri men shyǵarmashylyǵy, ult múddesi jolyndaǵy eńbegi keńinen sóz boldy. Jazýshy, Halyqaralyq «Alash» syılyǵynyń ıegeri Nurdáýlet Aqysh pen ánýartanýshy ǵalym, professor Káken Hamzın jazýshynyń tarıhı tulǵalardy tanytýdaǵy, ásirese ál-Farabıdi halyqqa jaqyndatýdaǵy rólin atap ótti.
Aqyn Ulyqbek Esdáýlet Álimjanovtyń halyqaralyq ádebı baılanystardy nyǵaıtýǵa qosqan úlesin aıtyp, ony álem ádebıetimen baılanystyrýshy tulǵa retinde sıpattady.
Mereıtoı sońynda jazýshynyń rýhyna arnap as berildi.