Mýzeı shamdary jarqyraǵan kesh

Mýzeı alańqaıyna tigilgen sándi sahna tálimdi keshtiń sal­tanatyn asyrdy. Bul túni Almaty aspany samaladaı jar­qyrap, alataýdan esken sal­qyn samal ashyq alańda konsert tamashalaǵan jurtqa kóte­riń­ki kóńil kúı syılady. Sahna tó­rinde tanymal mádenıet qaırat­kerleri óner kórsetip, ulttyq qun­­dylyqtarymyzdy dáripteı­tin qoıylymdar kórsetildi. Al mý­zeıdiń ekspozısııalyq zaldaryn­da birneshe kórmeniń tusaýy kesil­di.

Máselen «Jaýhar jádiger» kórmesinde mýzeıdiń negizgi ekspozısııasynan tys saqtalyp kelgen, asa qundy ári biregeı eksponattar jurtshylyqqa tanystyryldy. Olardyń qatarynda keıingi jyldary arheologııalyq qazbalar­dan tabylǵan altyn buıymdar, asataıaqtyń gaýharmen kómkerilgen basy, gıloshırli tehnıkamen oryndalyp, gaýhar, rýbın, granat, injý tastarmen bezendirilgen Faberjeniń sándi jumyrtqalary men basqa da sırek kezdesetin jaýhar jádigerler sheteldik týrısterdiń qyzyǵýshylyǵyn týdyrdy.

Mýzeı qorynda saqtalǵan sırek hattar men qujattar negizinde daıyndalǵan «Hat jazyp tur...» kórmesi ár dáýirdiń hat almasý mádenıetin kórsetti. Ekspozısııada poshta markalary, ashyqhattar, konvertter, Morze apparaty men eski jazý máshińkeleri usynyldy. Ásirese, B.Momyshulynyń Ǵ.Músirepovke jazǵan haty, Keńes ókimetiniń alǵashqy jyldaryndaǵy hattar men tarıhı qundylyǵy joǵary markalar, sýretter kelýshilerdiń yqylasyna ıe boldy.

«Shabyt jańǵyryǵy» atty taǵylymdy kórme qazaq beıneleý jáne músin óneriniń kórnekti ókilderi – sýretshi M.Kenbaev pen músinshi H.Naýryzbaevtyń 100 jyldyǵyna, sýretshiler V.Antoshenko-Olenevtiń 125, N.Sıvchınskııdiń 120, E.Sı­dor­kınniń 95 jáne músinshi E.Sergebaevtyń 85 jyldyq mereıtoılaryna arnaldy. Kórmede M.Kenbaevtyń týǵan jerdiń tarıhy men ulttyq turmysty beınelegen keskindemeleri, V.An­toshenko-Olenevtiń grafıkalyq jáne romantıkalyq týyndylary, N.Sıvchınskııdiń soǵys jyldary salǵan natýralyq shy­ǵarmalary, E.Sıdorkınniń ult­tyq óner men eposqa, ádebıet pen tarıhqa negizdelgen týyndylary, sondaı-aq H.Naýryzbaev pen E.Sergebaevtyń jeke zattary men músindik eńbekteri usynyldy.

Ahmet pen Ǵazıza Juba­novtardyń memorıaldy mýzeıi ataqty kompozıtor­lar Ahmet Qýanuly men Ǵazıza Jubano­va­nyń, rejısser Ázirbaıjan Mámbetovtiń shyǵarmashylyq murasyn tanystyratyn kórme usyndy.

Is-shara aıasynda Irannyń Almatydaǵy Bas konsýldyǵy ja­nyndaǵy Iran mádenı ókildigi usynǵan kórmede Esfahan qala­synan arnaıy kelgen sheberler Nafısa Orýdjı men Marııam Djaffarı ózderiniń sándik-qol­danbaly óner buıymdaryn – dástúrli kesteler, panno, sómke­ler, áshekeılerin kórsetti. Sonymen qatar Hosseın Hýshbaten parsy kallıgrafııa óneriniń qyr-syry týraly baıandady. Kórmede kúmis jáne mys ydystar, ejelgi qalalar beınesi, «Abaı men Fırdoýsı» taqyrybyndaǵy kórkem týyndylar, ortaǵasyrlyq oıshyldar beınelengen músindik  shyǵarmalar kórermen qyzyǵýshylyǵyn týdyrdy.

Kesh qonaqtary otandyq qolónershilerdiń «О́nerdiń sı­qyrly kúshi» kórme-jár­meń­kesin de tamashalady. Avtor­lyq ydys-aıaqtar, zergerlik buıymdar, toqyma jáne basqa da sándik buıymdar sheberlerdiń joǵary deńgeıin kórsetti.

Zaǵıp jandarǵa arnalǵan «Saý­saq ushyndaǵy óner» taktıldy kórmesinde Ábilhan Qasteev, Nıkolaı Hlýdov, Dıana Muham­med sııaqty belgili qylqalam she­berleriniń kartınalary qo­ıylǵan. Týyndylardy taktıl­dy formatta ázirleýge T.Júrge­nov atyndaǵy óner akademııasy­nyń oqytýshylary men stýdentteri ún qosqan. Jobaǵa arnalǵan aýdıo­dıskrıpsııany aýdarma isiniń kásibı mamany Anna Loenkonyń jetekshiligimen Maksut Narikbayev atyndaǵy joǵary gýmanıtarlyq mektep magıstranttary ázirlegen.

«Mýzeı túni» aksııasy barysynda sándik-qoldanbaly óner sheberleri: tekemet sheberi Álııa Saýǵabekova, syrmaq sheberi Tamara Qapqyzy, kıizben jumys isteıtin Bahytjan Qasymjanova men Anargúl Narbotanova, makrame sheberi Baqytjan Jumalıeva, syrǵalaq tehnıkasynda jumys isteıtin Nesibeli Asylbek, quraq kórpe sheberi Elmıra О́teshova, sýretshi-músinshi Iýlııa Pısyk kelýshilerge ulttyq buıymdardy jasaýdyń qyr-syryn úıretti. O.Tańsyqbaev atyndaǵy sándik-qoldanbaly óner kolledji stý­dentteri men oqytýshylary da «toqý óneri», «kórkem keskindeme», «keramıka» baǵyttary boıynsha sheberlik sabaqtar ótkizdi.

«Mýzeı túni» – bul jaı ǵana ekskýrsııa emes, bul – tarıhpen tildesýdiń, ulttyq qundylyqpen qaýyshýdyń sáti. Bul túni mýzeı shamdary jarqyrap, kelýshi­lerge erekshe format usynyldy. Mundaı aksııalar ásirese jas­tar úshin mańyzdy. Bul – ulttyq sana men tarıhı jadyny jańǵyrtý­dyń bir joly. Mádenıet jáne aqparat mınıstrligi jobanyń keń óris alýyna úlken qoldaý tanytty», deı­di Memlekettik ortalyq mý­zeıi dırektorynyń mindetin atqarýshy Serjan Sarov.

ALMATY