Qazaq án óneriniń qara nary, Memlekettik syılyqtyń laýreaty, belgili kompozıtor Altynbek Qorazbaev atyndaǵy «Án-jyrym saǵan, týǵan el!» atty halyqaralyq ánshiler baıqaýyna bıyl Qytaı, Qyrǵyz Respýblıkasy, Mońǵolııa elderinen jáne elimizdiń ár qıyrynan «sen tur, men ataıyn» deýge laıyqty úzdik ónerpazdar qatysyp, án merekesiniń bedelin arttyrdy.
Tórtinshi ret uıymdastyrylǵan dástúrli baıqaýǵa qatysýǵa áýeli 45 úmitkerden ótinish túsipti. Onlaın irikteý synyn jiti qadaǵalaǵan qazylar alqasy 45 ánshiniń ishinen 18-35 jas aralyǵyndaǵy 20 myqty ónerpazdy tańdap alyp, fınaldyq kezeńge ótkizdi. Halyqaralyq óner alamanyna qatysqan ónerpazdar Altynbek Qorazbaevtyń hıtke aınalǵan týyndylaryn náshine keltire shyrqady.
Erejege sáıkes eki kezeńdi qamtyǵan baıqaýda qatysýshylar áýeli kompozıtordyń eki ánin oryndasa, keıinnen erkin taqyrypta án shyrqap, ózderiniń vokaldyq áleýetin kórsetti. Toqtar Serikov, Meırambek Bespaev bastaǵan qazylar alqasynyń aıtýynsha, ánshiler baıqaýǵa úlken daıyndyqpen kelgen.
Halyqaralyq baıqaý qorytyndysynda Almaty oblysynan kelgen Medet Orynbaev bas júlde ıegeri atanyp, 1 mıllıon teńgeniń sertıfıkatyna ıe boldy. Qytaı Halyq Respýblıkasynan kelgen qandasymyz Ulbosyn Kenjabaıqyzynyń talanty talaıǵa tańdaı qaqtyrdy. О́zindik únimen kórermenderdi tánti etken Ulbosynǵa 1-júlde (800 myń teńge) buıyrdy. Atyraýlyq ánshi Merjan Qabdolov júldeli ekinshi, túrkistandyq Asyl Jomartov pen elordalyq Aqbópe Álibekova úshinshi orynǵa laıyq dep tanyldy.
О́ner dodasynda ózindik sheberligimen kózge túsken birneshe qatysýshyǵa yntalandyrý syılyǵy (200 myń teńge), júldeden tys qalǵan talanttarǵa arnaıy alǵyshattar (100 myń teńge) tabystaldy. Bir sózben aıtqanda, halyqaralyq baıqaý kóptiń kóńilinen shyqty.
Taraz