Úkimet otyrysynda QR Týrızm jáne sport vıse-mınıstri Erjan Erkinbaev elimizde 2029 jylǵa deıingi balalar men jasóspirimder týrızmin damytý jol kartasynyń ázirlengenin málimdedi. Qujat 7 baǵyt boıynsha 29 naqty is-sharany qamtıdy, dep habarlaıdy Egemen.kz.
Vıse-mınıstrdiń málimetinshe, balalar týrızmin qoldaý maqsatynda memleket Kids Go Free baǵdarlamasyn iske asyryp keledi. Onyń aıasynda 5,6 myńnan astam bala tegin áýe saparyna shyqqan. Bıyl bul joba arqyly taǵy 3 myń bala qamtylady dep josparlanǵan. Sonymen qatar, balalarmen birge júretin eresekterdiń tizimin keńeıtý jumystary júrgizilip jatyr.
«Mysaly, Astana ákimdigi jyl saıyn ár óńirden jınalǵan 1000-ǵa jýyq balany qamtı otyryp «Astana – Otanymnyń Elordasy» áleýmettik jobasyn iske asyryp keledi. Týr baǵdarlamasyna turý, tamaqtaný, aýqymdy mádenı-oıyn-saýyq baǵdarlamasyn uıymdastyrý kiredi. Týrıstik qoǵamdastyqpen birlesip arnaıy týrıstik marshrýttar ázirlendi. Ol mádenıet, tarıh jáne dástúrmen tanysýǵa, sondaı-aq oqýshylar men stýdentterdiń oı-órisin keńeıtýge baǵyttalǵan», dedi Erjan Erkinbaev.
Mınıstrlik bul bastamalardyń balalardyń oı-órisin keńeıtip, mádenı muramen, tarıhpen jáne dástúrmen tanysýǵa múmkindik beretinin atap ótti.