Jenevada Dúnıejúzilik densaýlyq saqtaý uıymynyń (DDU) 78-shi assambleıasynda pandemııaǵa qarsy alǵashqy halyqaralyq kelisim qabyldandy. Bul sheshim – COVID-19 indetinen keıingi úsh jylǵa sozylǵan kelissózderdiń nátıjesi, dep jazady Egemen.kz.
Qujat álem elderiniń bolashaq pandemııalarǵa daıyn bolýyn, sondaı-aq vaksınalar men dárilik quraldarǵa ádil ári jedel qol jetkizýin qamtamasyz etýdi kózdeıdi.
«Bul kelisim – kópjaqty yntymaqtastyq pen ǵylym salasyndaǵy mańyzdy jetistik. Ol jahandyq densaýlyq saqtaý júıesin nyǵaıtýǵa jol ashady», deıdi DDU Bas dırektory Tedros Adanom Gebreıesýs.
Fılıppın ókili, Assambleıa tóraǵasy Teodoro Herbosa kelisimniń tarıhı mańyzyn atap ótip:
«COVID-19 – ǵasyrlyq synaq bolsa, búgin qabyldanǵan kelisim – ondaı qaterge aldyn ala qam jasaýǵa berilgen biregeı múmkindik», – dedi.
Kelisim aıasynda DDU elderdiń ishki zańnamasyna aralaspaıtyny naqty kórsetilgen. Bul memleketterdiń egemendigin saqtaýǵa basa nazar aýdarylǵanyn bildiredi.
Aldaǵy ýaqytta qujatty iske asyrý úshin patogendik úlgilermen almasý jáne onyń paıdasyn bólisý tetikteri ázirlenedi. Sondaı-aq, ǵalamdyq jetkizý jáne logıstıka júıesi qurylyp, pandemııa kezinde qajet medısınalyq ónimderge barlyq eldiń teńdeı ári jedel qol jetkizýi qamtamasyz etiledi.
DDU kelisimin 60 memleket ratıfıkasııalaǵannan keıin, ol zańdy kúshine enedi.