О́mirge kelgen sátińnen bastap, týǵan jeriń saǵan altyn besik-atameken bolyp sanalatyny sózsiz. Ol meken – áke-shesheńniń, ata-ájeńniń, arǵy ata-babalaryńnyń, senen keıingi urpaqtardyń qutty qonysy, mekeni. Meniń týyp-ósken jerim – Soltústik Qazaqstan oblysy Esil aýdanyndaǵy Bulaq aýyly. Baqytty balalyq shaǵym osy aýylda ótti. Úlken qazaq aýylynda jalǵyz ǵana orys otbasy turdyq. «Sen oryssyń, biz qazaqpyz» dep bólgenderin eshqashan estimegendikten otbasymyzben ábden sińip ketkenimiz shyndyq.
Eń aldymen bul aýylǵa atam men ájem qonys aýdarǵan, keıin osy jerdiń topyraǵy buıyrdy. Kóz aldyma únemi senim men syılastyqta ómir súrgen aýyl adamdary keledi. Áli esimde kórshilerimiz Taımýllınder, Qojahmetovtar, Muqashevter otbasylary týǵanymyzdaı jaqyn bolyp ketti.
Aýyldyń balalarymen birge qoı baǵatynbyz. Sondaǵy dala shóbiniń hosh ıisi-aı! Sol aıaýly sátterdi esime alsam kózime eriksiz jas keledi. Jazdyń jaıma shýaq kúnderinde Baqytgúl jáne Roza degen dostarymmen úı mańaıyndaǵy kógalǵa kórpemizdi jaıyp, qýyrshaq oınasaq, inilerim de ózderi shamalas balalarmen doptyń qyzyǵyna enetin. Balalyq shaǵymyzdaǵy dostarymyzben áli kúnge deıin aralasyp turamyz.
Tamyrlarymyz, marqum Qaıyrly aǵa men Sapýra táte Qashaǵanovtar týraly erekshe aıtqym keledi. Olar ájem Mılıýtına Anastasııamen jaqyn dos bolatyn. Bul otbasylyq dostyq ári qaraı da jalǵasyn taýyp, uldary Sapar meniń áke-sheshemmen jekjattyq baılanysta. Áli kúnge deıin týystyq, jaqyndyq ara-qatynasymyz úzilgen emes. Bul kisiler úıde uıymdastyrylatyn merekelerimizdiń syıly qonaǵy.
Ákem Vasılıı kezinde «Qazaqsha kúres» sport túrin jaqsy meńgergen, sovhozda mehanızator bolyp jumys istegen aýyldyń syıly adamy boldy. Anam Valentına bizge baýyrsaq pisirip, aıran uıytatyn. Anamnyń zamandasy Kúmis Imanbaırova aıran uıytýy úıretkeni de esimde. Búginge deıin kúnine birneshe ret telefon arqyly sóılesip turatyn, bir-birine degen syılastyǵy úzilmegen adal dostar. Jalpy áke-sheshem qazaq halqynyń salt-dástúrlerine syılastyqpen qarap, úırenip qana qoımaı, bizdiń de boıymyzǵa sińire bildi. Kórshilermen birge soǵym soıyp, kisilerdi qýyrdaqqa shaqyratyny esimnen ketpeıdi. Aýyldaǵy balalarmen birge oınap, birge júrip qazaq tilin erkin meńgerdim. Alǵash qazaq mektebinde saýat ashtym. Úıdegi menen kishi úsh inim de qazaqsha taza sóıleıdi. Ata-anam men týǵan aýylym meniń boıyma tilge, elge degen qurmetti sińire bildi. Búgingi kúni mektepte qazaq tili men ádebıeti múǵalimimin. Osy joldy tańdaýyma óz isiniń mamany, qazaq tili men ádebıetinen tálim alǵan ustazym Muhamedjanova Gúlsarııa Eleýkenqyzynyń yqpaly erekshe boldy. О́zim sııaqty Bulaq aýylynan shyqqan ári áriptesim, ári qurbym Táttibaeva Aıjan Boranbaıqyzy men aýylymyzdyń kelini Ospanova Balǵanym Dıýsenqyzy sııaqty qazaq tiliniń damýyna óz úlesterin qosyp júrgen muǵalimderiniń eńbekterin erekshe baǵalaımyn.
Jalpy men úshin Bulaq aýylynyń adamdary erekshe ystyq. Eń baqytty, taza, ýaıym-qaıǵysyz kezderimdi osy aýylmen baılanystyramyn. Jıi túsime kiredi.Osyndaı qazaq aýylynda týyp-óskenimdi maqtan tutamyn! Memlekettik tildi osy deńgeıde úıretkeni úshin elime, jerime alǵysym sheksiz!
Lıýdmıla Mılıýtına,
Petropavl qalasy
№ 17 ulttyq órkendeý orta mektebi
qazaq bóliminiń muǵalimi,
«Urpaq» qazaq mádenı-aǵartý ortalyǵy» QB múshesi