Italııanyń Týrın qalasynda Aleksandr Býblıktiń juldyzy jandy. «Chellendjer» sanatyndaǵy dodada elimizdiń birinshi raketkasy qarsylas shaq keltirmedi. Júlde qory 227 270 eýrony quraǵan jarystyń bastapqy básekelerinde barlyq qarsylastaryn esh qınalmaı utqan jerlesimiz shırek fınalda álemdik reıtıngte 51-orynda turǵan argentınalyq Tomas Martın Etchevarımen kúsh synasty. 25 jastaǵy Ońtústik Amerıkanyń oǵylany osydan eki jyl buryn Rolan Garrostyń shırek fınalyna deıin jetip, úzdikter tiziminde 27-orynǵa deıin kóterildi. 2 saǵat 04 mınýtqa sozylǵan saıys 6:2, 3:6, 7:5 esebimen Býblıktiń paıdasyna sheshildi. Jartylaı fınalda Aleksandr ATR reıtınginde 71-satyda turǵan germanııalyq Danıel Altmaıerden aılasyn asyrdy – 6:2, 6:4. Fınalda qytaılyq Bý Iýden (73) basym tústi – 6:3, 6:3.
Eki jylǵa sozylǵan úzilisten keıin kortqa qaıta oralǵan Zarına Dıas ta óz jankúıerlerin qýantty. Ol Japonııanyń Kýrýme qalasynda jalaýy jelbiregen ITF W50 týrnırinde aldyna jan salmady. Alǵashqy aınalymdarda jergilikti oıynshylardy utqan jerlesimiz jartylaı fınalda qytaılyq Meılın Vandy qapy qaldyrdy – 6:3, 3:6, 7:5. Fınalda japonııalyq Aıano Shımısýge shań qaptyrdy – 6:4, 6:3.
Elimizdiń ekinshi raketkasy Iýlııa Pýtınseva Fransııanyń Strasbýrgindegi týrnırdiń tusaýkeser kezdesýinde slovakııalyq Rebekka Shramkovaǵa esh qaırat kórsete almady – 0:6, 4:6. Jarysta Pýtınsevadan bólek Elena Rybakına da óner kórsetedi. Ol alǵashqy aınalymda bos boldy. Ekinshi kezeńde birinshi oıynynda germanııalyq Eva Lısti jeńgen qytaılyq Van Sınıýımen sheberlik baıqasady.