ASTANA. 3 tamyz. Bas prokýratýra Memleket basshysy jarııalaǵan bes ınstıtýsıonaldyq reformalardy jáne «100 naqty qadam» Ult josparyn júzege asyrý boıynsha maqsatty túrde jumys júrgizýde. Bul týraly Bas prokýratýranyń baspasóz qyzmeti habarlady.
Qadaǵalaý organy memlekettik basqarý, sot tóreligi, sondaı-aq, zań ústemdigi qaǵıdasyn qamtamasyz etý boıynsha usynystaryn ázirledi jáne olardy Jańǵyrtý jónindegi Ulttyq komıssııa qoldady. Atap aıtqanda, alqabıler ınstıtýtyn jetildirý, tergeý áreketterine sanksııa berý jónindegi prokýratýranyń fýnksııalaryn birtindep tergeý sýdıalaryna berý, azamattyq-quqyqtyq daýlardyń jekelegen sanattary boıynsha prokýrorlardyń sotqa qatysýyn qysqartý jóninde usynystar engizildi.
Sonymen qatar, bas prokýror atap ótkendeı, kózdelgen maqsattardy tıimdi júzege asyrý qalyń jurtshylyqtyń qatysýynsyz jáne olardyń qoldaýynsyz múmkin emes. Kóp jaǵdaıda túpki nátıje reformalardyń negizine alynǵan ıdeıalardy halyqtyń qalaı qabyldaǵanynan jáne olardy qoldaǵanynan táýeldi bolady. Sondyqtan bizdiń azamattardyń osy jumysqa belsendi qatysqandary mańyzdy bolyp tabylady.
Búgin «Quqyq qorǵaý organdaryn reformalaý» atty ınternet-saıt iske qosyldy (www.pro.kz). Onda kez-kelgen azamat quqyq qorǵaý júıesin reformalaý jáne zańnamany jetildirý boıynsha óz usynystaryn qaldyra alady. Internet-platformany qurýdyń basty maqsaty – halyqty quqyq qorǵaý organdaryn jańǵyrtý jónindegi jumysqa tartý, quqyqtyq júıeni sapaly jańartý máselelerine beı-jaı qaramaıtyn azamattardyń barlyǵymen syndarly suhbat jasaý bolyp tabylady
Saıtty paıdalanýshylarǵa tıimdi bolýy úshin forýmda úsh bólim qarastyrylǵan. Birinshisi azamattardyń quqyq qorǵaý organdarynyń qyzmetine qatysty reformalardy iske asyrý boıynsha usynystaryn jınaý úshin qurylǵan. Ekinshi bólimde azamattar Ult josparynyń oryndalýyna baǵyttalǵan ulttyq zańnamany reformalaý boıynsha usynystaryn qaldyra alady. Úshinshi bólimde halyqaralyq aldyńǵy qatarly tájirıbeni eskere otyryp quqyq qorǵaý organdarynyń reformasyn júrgizý boıynsha usynystar jınaqtalyp, talqylanady. Saıtta jumys isteý tártibi sáıkes nusqaýlyqta muqııat kórsetilgen, osyny basshylyqqa ala otyryp taqyryp ashýǵa bolady nemese buryn jasalǵan taqyryptarǵa pikir qaldyrýǵa múmkindik bar.
Bas prokýratýra barlyq qazaqstandyqty jalpyulttyq jospardy júzege asyrýdyń ózekti máselelerin talqylaýǵa qatysýǵa, quqyq qorǵaý júıesin jańǵyrtý týraly pikir bildirýge jáne sharalar usynýǵa shaqyrady.
Elaman Qońyr.
Derek: Bas prokýratýranyń baspasóz qyzmeti.
Sýret: egemen.kz.