Prezıdent bıyl sáýir aıynda qol qoıǵan jańa Sý kodeksinde kózdelgen talap boıynsha sala mınıstrliginiń resmı saıtynda Ulttyq aqparattyq esep jyl saıyn jarııalanyp otyrady. Bul sý qorynyń jaı-kúıi, ony qorǵaý-paıdalaný boıynsha ótken kúntizbelik jylǵa arnalǵan taldaý esebi, dep jazady Egemen.kz.
Atalǵan qujatta negizgi ózenderdiń sý mólsheri, sý sharýashylyǵy men gıdrotehnıkalyq qurylystardyń, onyń ishinde memleketaralyq qurylystardyń jaǵdaıy, t.b. týraly maǵlumattar kórsetiledi.
Sala mınıstrliginiń baspasóz qyzmetiniń málimdeýinshe, sondaı-aq qujatta sý qoryn qorǵaý boıynsha atqarylyp jatqan sharalar, ınvestısııalyq jobalardy iske asyrý jáne zamanaýı tehnologııalardy engizý týraly aqparattar baıandalǵan.
«Ortalyq memlekettik jáne jergilikti atqarýshy organdar esep berý úshin aqparatty esepti jyldan keıingi jyldyń 1 naýryzynan keshiktirmeı usynýǵa mindetti. Ulttyq eseptiń ózi 1 mamyrdan keshiktirilmeı jarııalanady. Bul Qazaqstandaǵy sý resýrstaryn basqarý men paıdalanýdyń ashyqtyǵyn qamtamasyz etýge tıis. Sý kodeksiniń ózi bıyl 10 maýsymda kúshine enedi. Sondyqtan biz bul esepti 2026 jyldan bastap jarııalaı bastaımyz», dedi Sý saıasaty departamentiniń dırektory Serikjan Beketaev.