Prezıdent tapsyrmasymen iske asyrylyp jatqan «QazMunaıGaz» ulttyq kompanııasynyń iri jobasy – polıetılen óndiretin zaýyt. Bıyl tolyq kólemdegi qurylys jumystary bastaldy, dep jazady Egemen.kz.
Atalǵan jobamen birge eki ınfraqurylymdyq joba – gaz separasııalaý kesheni men magıstraldyq qubyrlardy salý iske asyrylatyn bolady. Bul 3 jobanyń jalpy quny shamamen 11 mlrd AQSh dollaryn quraıdy. Joba QMG men seriktesterdiń tikeleı ınvestısııalary arqyly júzege asyp jatyr.
Búginde barlyq ınvestısııalyq sheshimder qabyldandy. Osy oraıda, Úkimet qoldaýynyń arqasynda qurylys normalarynyń keıbir artyq talaptary alynyp tastaldy. Nátıjesinde QMG men «Polıetılen» jobasynyń ınvestorlary qajetti ınvestısııalyq sheshimderdi der kezinde qabyldady.
Oǵan qosa, gaz separasııalaý kesheni jobasyn qarjylandyrý – ashyq másele. Qazaqstan damý bankimen qolaıly sharttardy qarastyryp jatyr. Úkimet basshysynyń tapsyrmasyna qaraı «QazMunaıGaz» jobalardaǵy otandyq qamtý jáne kadrlyq qoldaýdy damytýǵa basa nazar aýdarady.
Qazir otandyq óndirýshilerge aýdıt júrgizilip jatyr. Osy kezge deıin 34 zaýyt aýdıtten tolyq ótip, taǵy 38 kompanııaǵa taldaý júrgizilip jatyr. Nátıjesinde, Atyraýmunaımashqa jalpy somasy 10 mln AQSh dollarynan astam qarajatqa pırolız prosesindegi 2 iri baǵanǵa tapsyrys berildi. Sonyń ishinde eń irisi – etılen fraksıonatory, bıiktigi 84,5 metr, salmaǵy 1 885 tonna.
Bularmen birge ıspandyq merdiger Technicas Reunidas bizdiń elde Injınırıngtik ortalyq qurý jóninde sheshim qabyldady. Odan bólek, «Talanttardy tartý» baǵdarlamasy bekitilip, onyń aıasynda ınjenerlik mamandyqtar boıynsha 120 túlekti oqytý men jumysqa ornalastyrý josparlanǵan. QazUTÝ, Nazarbaev Ýnıversıteti, S.О́tebaev atyndaǵy Atyraý munaı jáne gaz ýnıversıteti, QBTÝ joǵary oqý oryndarynan úzdik stýdentterdi bólý týraly memorandýmdarǵa qol qoıyldy.
Baǵdarlamaǵa sáıkes stýdentter alǵashqy 3 aı onlaın formatta oqıdy. Odan keıin oqýdy Ispanııada merdiger esebinen jalǵastyrady. Nátıjesinde, Technicas Reunidas stýdentterdi óziniń álemdegi jobalaryna jumysqa ornalastyrady. Osy jylǵy tamyz-qyrkúıek aılarynda stýdentterdiń birinshi legi iriktelip alynady.