Pavlodar qalasyndaǵy «Baıantaý» sport kesheninde Ekinshi dúnıejúzilik soǵystyń ardageri, Baıanaýyl aýdanynyń Qurmetti azamaty Rymtaı Izbastyulyn eske alýǵa arnalǵan týrnır ótti, dep habarlaıdy Egemen.kz Qazaq Kuresi Assosıasııasynyń baspasóz qyzmetine silteme jasap.
Qazaq kúresinen ótken respýblıkalyq týrnırde eresekter túıe balýan ataǵy úshin beldesse, 2008-2009 jyldary týǵan jasósipirimder 9 salmaq dárejesi boıynsha kúshin synady. Eki kúnge ulasqan dúbirli dodaǵa barlyq óńirden 187 balýan kilemge shyqty. Pavlodar oblysynyń ákimi Asaıyn Baıhanovtyń quttyqtaý sózinen keıin, soǵys ardageriniń uly Marat Izbastın, grek-rım kúresinen Atlanta Olımpıadasynyń chempıony Iýrıı Melnıchenko, qazaq kúresinen álem chempıony, «Qazaqstan barysy» respýblıkalyq týrnıriniń birneshe márte jeńimpazy Aıbek Nuǵymarov sportshylarǵa sáttilik tiledi.
Osy óńirde qazaq kúresiniń damýyna úles qosyp júrgen birqatar azamattarǵa Qazaq Kuresi Assosıasııasynyń Alǵys haty tabystaldy.
Túıe balýandar dodasynda Pavlodar oblysynyń balýany Muhtar Dálelhanuly fınalda mańǵystaýlyq Nurdáýlet Jarylǵapovty jyǵyp, chempıon atandy. Qola júlde Jambyl oblysynan kúresken Aıdar Beskempirge buıyrdy. Alyptar tartysynyń jeńimpazyna 2 mıllıon, kúmis belbeý ıegerine 1 mıllıon, qola belbeý oljalaǵan balýanǵa 500 myń teńge berildi.
Asa tartysty ótken jasóspirimder tartysynda I, II jáne III oryndardyń ıegerlerine syıǵa 100 000, 50 000, 30 000 teńge syıaqyǵa qosa medal, dıplommen marapattaldy. Úzdikterdi marapattaýda 60, 65 jáne +82 kg salmaq dárejesiniń jeńimpazdary Abaı Qunanbaıǵa, Serǵazy Qaıyrkenovke jáne Álisher Salyqqa Q.Sátbaev atyndaǵy Qazaq ulttyq tehnıkalyq zertteý ýnıversıtetiniń, S.Toraıǵyrov ýnıversıtetiniń jáne M.Qozybaev atyndaǵy Soltústik Qazaqstan ýnıversıtetiniń oqý granttary tabystaldy.
Ekinshi dúnıejúzilik soǵys ardageri Rymtaı Izbastyuly Pavlodar oblysyndaǵy Baıanaýyl aýylynyń týmasy. Ol ár jyldary bólim nusqaýshysy, aǵa ınspektor, Baıanaýyl MTS partııa bıýrosynyń, «Alekseev», «Aleksandrov», «Baıanaýyl» keńsharlary partııa komıtetteriniń hatshysy, nusqaýshy-partııa uıymdastyrýshysy, ıdeologııalyq bóliminiń meńgerýshisi, kásipodaq tóraǵasy qyzmetterin atqarǵan. «Japonııany jeńgeni úshin», «Tyń jerlerdi ıgergeni úshin» medaldarimen, «1941-1945 jyldardaǵy Uly Otan soǵysyndaǵy Jeńiske 20 jyl», «1941-1945 jyldardaǵy Uly Otan soǵysyndaǵy Jeńiske 30 jyl», «1941-1945 jyldardaǵy Uly Otan soǵysyndaǵy Jeńiske 40 jyl», Keńes Odaǵynyń marshaly G.K.Jýkovtyń mereıtoılyq medaldarimen marapattalǵan.