Elimizdiń Qarýly Kúshterindegi bir top serjant AQSh-taǵy halyqaralyq dodada alǵa shyqty. Arızona shtatyndaǵy Navaho áskerı bazasynda ótken Best Warrior-2025 baıqaýynda el namysyn qorǵaǵan serjanttar – Darhan Aslan men Raýan Toqtarbekov myqtylar sapynan kórinip, Qazaqstan Qarýly Kúshteriniń abyroıyn asqaqtatty, dep habarlaıdy Egemen.kz.
Atalǵan jarys AQSh Ulttyq ulanynyń uıymdastyrýymen serjanttar quramynyń kásibı sheberligin baǵalaý maqsatynda ótkizilip keledi. Bıylǵy baıqaýǵa Amerıka Qurama Shtattarynyń jeti shtatynan, sondaı-aq Fıdjı, Gýam, Tonga jáne Fılıppın elderinen kelgen áskerı qyzmetshiler qatysty. Qatysýshylarǵa áskerı fıtnes testten bastap, taktıkalyq daıyndyq, jaýyngerlik medısına, topografııa, patrýldik tapsyrmalar, sondaı-aq M-240V pýlemeti, M-4 vıntovkasy, M-17 tapanshasymen atýdan bastap 12 kelilik júkpen 28 shaqyrymdyq marsh-brosokqa deıingi kúrdeli synaqtar usynyldy.
О́tkizilgen synaqtar barasynda otandastarymyz erekshe nátıjelerimen kózge tústi. Atap aıtqanda, serjant Darhan Aslan 800 metr qashyqtyqty 2 mınýt 5 sekýndta júgirip ótip, baıqaý tarıhynda buryn-sońdy bolmaǵan rekord ornatty. Budan bólek, ol 28 shaqyrymdyq marsh-brosokty 3 saǵat 39 mınýtta aıaqtap, tózimdilik pen rýhtyń jarqyn úlgisin kórsetti.
Al gvardııa serjanty Raýan Toqtarbekov qarý-jaraqpen atýdan barynsha dáldik tanytyp, «Úzdik mergen» ataǵyna ıe boldy. Ol AQSh armııasy qoldanatyn qarý úlgilerinen oq atýda úzdik nátıje kórsetip, arnaıy sertıfıkatpen marapattaldy.
Generaldyq shtabtyń serjanttar quramymen jumys basqarmasynyń aǵa nusqaýshysy, shtab-serjant Beglan Beısalıev jarystyń joǵary deńgeıde ótkenin atap ótti:
«Qatysýshylardyń kópshiligi – tájirıbeli áskerı mamandar. Soǵan qaramastan, bizdiń serjanttar ózderiniń kásibı sheberligin, rýhyn, daıyndyq deńgeıin naqty ispen dáleldedi. Bul — Qazaqstan armııasy úshin úlken maqtanysh,» dedi ol.
Baıqaý sońynda sarbazdar márege memlekettik Týmen jetip, halyqaralyq arenada el namysyn qorǵap shyqty. Qorǵanys mınıstrliginiń málimetinshe, bul jetistik – serjanttar quramynyń júıeli daıyndyǵy men halyqaralyq tájirıbege ashyqtyǵynyń nátıjesi.
Araılym MYRZAHAN, EUÝ 2 kýrs stýdenti