Búgin Májilistiń jalpy otyrysynda depýtat Oljas Quspekov Qazaqstandaǵy krıptoaktıvterdi retteýdegi júıeli kemshilikterdi atap, bul jaǵdaı eldiń qarjy júıesine, azamattardyń qaýipsizdigine jáne memlekettik ınstıtýttardyń bedeline eleýli qaýip tóndirip otyrǵanyn málimdedi, dep jazady Egemen.kz.
«Búgingi tańda elimizde krıptovalıýtalarǵa qatysty qylmystyq ister boıynsha tárkilengen aktıvterdi saqtaý tetigi múlde joq. Bul óte qaýipti jaǵdaı. Arnaıy sıfrlyq rezerv bolmasa, bul aktıvter joǵalyp ketýi, urlanýy nemese úshinshi tulǵalar arqyly zańdastyrylýy múmkin», dedi Oljas Quspekov.
Sondaı-aq, depýtat krıptoblogerler men koýchtar tarapynan jastardy kúmándi platformalarǵa tartý derekterin de synǵa aldy.
«Lısenzııasyz «krıptokoýchtar» halyqqa jalǵan ýáde berip, ońaı paıda tabýǵa shaqyrady. Olar azamattardyń qarjylyq qaýipsizdigimen oınap otyr. Bul áreketterdi dereý toqtatýymyz kerek. Sondyqtan «ınvestısııalyq koýchıng» uǵymyn zańdastyryp, oǵan mindetti lısenzııa talaptaryn engizýdi usynyp otyrmyz», dep málimdedi depýtat.
Qarjy monıtorıngi agenttiginiń málimetterine sáıkes, 10 ekinshi deńgeıli bank arqyly 4,2 mlrd teńgeden astam kúmándi operasııalar ótken. Bul ishki baqylaý tetikteriniń álsizdigin kórsetedi.
Depýtattyń pikirinshe, taǵy bir mańyzdy másele – Qazaqstanda tyıym salynǵan lısenzııasyz krıptobırjalardyń AppStore men PlayMarket sııaqty platformalarda áli de erkin jumys isteýi.
«Zańnamada naqty tyıym salynǵanyna qaramastan, lısenzııasyz krıptobırjalar is júzinde jumysyn jalǵastyryp keledi. Olar AppStore jáne PlayMarket platformalarynda qoljetimdi, keńinen jarnamalanyp, buqaralyq is-sharalarǵa jáne áleýmettik jelilerge qatysýda. Chainalysis kompanııasynyń derekteri boıynsha, 2023 jyly Qazaqstandaǵy krıptoaınalymnyń 86,2%-y nemese 4,1 mlrd AQSh dollarynan 3,5 mlrd dollary zańsyz segment arqyly ótken», dedi Oljas Quspekov.
Depýtattyq saýalyn qorytyndylaı kele Oljas Quspekov kelesi sharalardy qabyldaý qajet dep atap ótti.
«Ulttyq Bank janynan qylmystyq ister aıasynda tárkilengen krıptoaktıvterdi saqtaý úshin memlekettik sıfrlyq rezerv qurý múmkindigin qarastyrý. Zańnamaǵa «ınvestısııalyq koýchıng» uǵymyn engizip, bul qyzmet túrine mindetti lısenzııalaý talabyn bekitý, sondaı-aq buzýshylardyń akkaýnttaryn buǵattaý tetigin ázirleý. Aqsha aýdarymdaryna aýdıt júrgizip, bankter tarapynan talaptardyń saqtalýyna ishki baqylaýdy kúsheıtý. Lısenzııasy joq krıptobırjalarǵa tıesili saıttar men qosymshalardy buǵattaý bastamasyn kóterý, sondaı-aq ruqsat etilgen platformalardyń resmı tizimin jarııalaý» dedi depýtat.