Premer-mınıstr Oljas Bektenov «Tatneft» JAQ bas dırektory Naıl Maganovpen kezdesý ótkizdi. Atyraý oblysynda býtadıen jáne sıntetıkalyq kaýchýk óndirý boıynsha iri ınvestısııalyq jobany iske asyrý barysyn qosa alǵanda, munaı-gaz hımııasy salasyndaǵy yntymaqtastyqty damytý jónindegi josparlar talqylandy.
«Tatneft» JAQ bas dırektory Naıl Maganov jobanyń qazirgi jaǵdaıy týraly habarlady. Búgingi tańda merdiger – qytaılyq «China Tianchen Engineering Corporation» ınjınırıngtik kompanııasymen belsendi jumys júrgizip jatyr. Rezeńke-tehnıkalyq ónerkásipte, shınalar óndirisinde paıdalanýǵa 60 myń tonna dıvınılstırol sıntetıkalyq kaýchýk, jol jabyndary men plastmassalarǵa qajetti 40 myń tonna stırol-býtadıen-stırol kaýchýk, jyl saıyn joǵary oktandy benzın retinde 40 myń tonna metıl-tret-býtıl efırin shyǵarý josparlanǵan. Investısııalyq kezeń osy jyldyń 1 shildesinen iske qosylady.
Kezdesý barysynda «QazMunaıGaz» UK» AQ-men birlesip júzege asyrylatyn «Qaraton Podsolevoı» ýchaskesinde geologııalyq barlaý jumystary talqylandy. Qazirde 5,5 myń metrge tereń barlaý uńǵymasyn burǵylaý júrip jatyr. Sondaı-aq tereftal qyshqyly, polıetılentereftalat óndirý jobasyna nazar aýdaryldy.
Premer-mınıstr Úkimet birlesken josparlardy iske asyrýda, ózara tıimdi yntymaqtastyq úshin sheshimder izdeýde syndarly dıalogke ashyq ekenin málim etti. Elimizdiń Otandyq ónerkásipke «Tatneft» tehnologııalary men saraptamasyn engizýge múddeliligi atap ótildi.