Qorǵanys mınıstri general-polkovnık Rýslan Jaqsylyqovtyń tóraǵalyǵymen Qaraǵandy garnızonynda Qorǵanys mınıstrligi alqasynyń kóshpeli otyrysy ótti. Jıynda 2024–2025 jyldardaǵy qysqy oqý kezeńiniń qorytyndysy shyǵarylyp, jazǵy kezeńge arnalǵan basym baǵyttar belgilendi, dep habarlaıdy Egemen.kz.
Jıynǵa Qorǵanys mınıstrligi, Bas shtab, Qarýly kúshter túrleri men óńirlik qolbasshylyq áskerleriniń basshylyq quramy, sondaı-aq áskerı oqý oryndarynyń ókilderi qatysty.
Mınıstr qazirgi geosaıası jaǵdaı men sheteldik armııalardyń tájirıbesin eskere otyryp, Qazaqstan armııasyn daıarlaýdaǵy jańa basymdyqtardy atap ótti. Sonymen qatar, Qorǵanys mınıstriniń birinshi orynbasary – Bas shtab bastyǵy general-leıtenant Sultan Qamaletdınov jaýyngerlik jáne jumyldyrý daıyndyǵynyń jaı-kúıi jóninde baıandama jasady.
Al tárbıe jáne ıdeologııalyq jumys jónindegi orynbasary general-maıor Shaıh-Hasan Jazyqbaev áskerı tártip pen quqyqtyq ahýal boıynsha aqparat berdi. Jıynda jumyldyrý rezervin kúsheıtý, áskerı mindettilerdiń jıyndaryn josparlaý, quqyq buzýshylyqtarǵa jol bermeý, qatań jarǵylyq tártipti saqtaý syndy máseleler qozǵaldy.
Alqa otyrysyn qorytyndylaǵan Qorǵanys mınıstri komandalyq quramǵa birqatar basym mindetter qoıdy. Olardyń qatarynda taktıkalyq barlaý mindetterin pysyqtaı otyryp, ushqyshsyz ushý apparattary operatorlaryn daıarlaý, jaýyngerlik jáne arnaıy daıarlyq boıynsha praktıkalyq sabaqtardy uıymdastyrý, ınjenerlik-saperlik bólimshelerdi daıarlaý, qaýipsizdik sharalaryn kúsheıtý, qarýmen jumys isteý jónindegi talaptardy saqtaý jáne t. b. tapsyrmalar bar.