Qaraǵandy oblysynda eń jas polıseı joldaǵy qaýipsizdikke úles qosyp júr, dep habarlaıdy Egemen.kz.
Qaraǵandy oblysynda jol qozǵalysy qaýipsizdigin qamtamasyz etýge 8 jastaǵy Nurasyl Tólegenov qosyldy. Jol erejelerin jetik meńgergen balaqaı áleýmettik jeli qoldanýshylary arasynda keńinen tanymal.
Ol Qaraǵandy-Almaty baǵytyndaǵy respýblıkalyq mańyzy bar tasjolda polısııa qyzmetkerlerimen birge júrgizýshilerge túsindirý jumystaryn júrgizdi. Nurasyl leıtenant shenin taǵyp, arnaıy kıim kıip, tártip saqshylarymen qatar qyzmet etti. Ol júrgizýshilerge jol-kólik oqıǵalarynyń aldyn alý úshin basty erejelerdi túsindirip, jyldamdyqty asyrmaý, qarsy baǵytqa shyqpaý jáne jolda demalysty eskerýsiz qaldyrmaý qajettigin eskertti. Polısııa bolýdy armandaıtyn Nurasyldyń bul qyzyǵýshylyǵy beker emes, onyń ákesi de patrýldik polısııa batalonynyń qatarynda qyzmet atqarady.
– Qazirgi tańda jol qozǵalysy qaýipsizdigi – kún tártibindegi eń ózekti máselelerdiń biri. Jaz mezgilinde Qaraǵandy K Balqash baǵyty boıynsha kólik aǵyny kúrt artady. Osyǵan baılanysty atalǵan jolda polısııa narıadtarynyń sanyn arttyrdyq. Buryn bul baǵytta 17 avtopatrýl jumys istese, qazir olardyń sany 30-ǵa jetkizildi. Ár patrýl beketiniń araqashyqtyǵy shamamen 10 shaqyrym, – deıdi patrýldik polısııa batalonynyń komandıri Medet Nurmuhanov.
Aıta keteıik, 2025 jyldyń basynan beri Qaraǵandy oblysynda 34 jol-kólik oqıǵasy tirkelip, onyń saldarynan 16 adam kóz jumyp, 51 azamat túrli dene jaraqatyn alǵan. Sonymen qatar respýblıkalyq mańyzy bar tasjoldarda 25 júrgizýshi mas kúıinde kólik tizgindegeni úshin ustalǵan.Qoǵamdyq qaýipsizdikke ún qosqan eń jas polıseıdiń bastamasy – barshaǵa úlgi. Bul is-shara turǵyndar arasynda quqyqtyq mádenıetti arttyrýǵa baǵyttalǵan is-sharalardyń bir bóligi retinde uıymdastyryldy.