Áýe qorǵanysy kúshteriniń mamandaryn daıarlaý jáne ushqyshsyz basqarylatyn qurylǵylardy jaýyngerlik qoldaný oqý-jattyǵý ortalyǵynda ushqyshsyz ushatyn avıasııalyq (UUA) júıelerdiń operatorlaryn oqytýdyń kezekti kýrsy bastaldy.
Oqý-jattyǵý ortalyǵynda shetelde oqyǵan, óz bilimin jas mamandarǵa úıretetin sertıfıkaty bar mamandar qyzmet etedi jáne sabaq beredi. Bul bilim ordasy oqytýdy bastaǵannan beri Qarýly kúshter men basqa da áskerı quralymdarǵa júzdegen mamandar daıarlady.
Sabaqtar «SkyLark1LEX» taktıkalyq barlaý júıesin qoldana otyryp ótkiziledi. Bul joǵary dáldiktegi qural naqty ýaqyttaǵy beınelerdi berý men ozyq navıgasııalyq múmkindikterge ıe.
«Búginde mundaı qurylǵylar qorǵanys jáne barlaý júıesindegi negizgi pozısııalardy senimdi túrde alady. Sondyqtan biz jańa tehnologııalardy jetik meńgerýge tıis joǵary bilikti operatorlardy daıarlaýǵa erekshe nazar aýdaramyz», dep túsindirdi shtab bastyǵy, UUA jaýyngerlik qoldaný oqý-jattyǵý ortalyǵy bastyǵynyń orynbasary podpolkovnık Almat Haırýshev.
«Shyǵys» óńirlik qolbasshylyǵy 44736 áskerı bóliminiń kelisimshart boıynsha áskerı qyzmetshisi, qatardaǵy jaýynger Ferhat Orymbaev buryn jarý isimen aınalysqan. Qazir onyń áskerı kásibinde túbegeıli ózgeris bolyp jatyr.
«Jarý isi maǵan unaıtyn. Biraq men árqashan ushqyshsyz basqarylatyn avıasııalyq júıelerdi úırenýdi armandaıtynmyn. Meni ushqyshsyz ushatyn apparattardyń mamany etip taǵaıyndaǵan kezde, sol armanǵa qol jetkize bastaǵandaı boldym. Qazir Áýe qorǵanysy kúshteriniń oqý-jattyǵý ortalyǵynda oqımyn, UUA operatory bolamyn», dedi Ferhat.
Oqý-jattyǵý barysynda kýrsanttar borttyq jabdyqty iske qosýdan jáne baptaýǵa daıyndyqtan bastap, alynǵan aqparatty pılottaýǵa jáne taldaýǵa deıingi tolyq sıkldi meńgeredi. Sabaqtyń praktıkalyq bóligi trenajerlerde de, dalada da ótedi. Kýrsanttar 40 kúnge sozylatyn kýrsty aıaqtaǵannan keıin sertıfıkattar alady.
Taraz