Soltústik Qazaqstan oblysynda kene qaptap, bir jarym aı ishinde dárigerge 408 adam júgingen. Bul byltyrǵy jyldyń osy kezeńimen salystyrǵanda úsh ese kóp, dep habarlaıdy Egemen.kz.
Kúnniń erte jylynyp, aýanyń joǵary temperatýrasy qystaǵy uıqydan keıin atalǵan jándikterdiń tezirek oıanýyna sebep bolǵan.
Epıdemıologtardyń eskertýinshe, kenelerdiń agressıvti minez-qulqy – mamyr aıynda qalypty jaǵdaı, tabıǵat aıasynda serýendegen kezde asa saq bolý qajet.
Aldyn alý sharalary júrgizilgenine qaramastan, juqtyrǵan jaǵdaılardy tolyq boldyrmaý múmkin bolmaǵan.
Oblystyq sanıtarııalyq-epıdemıologııalyq baqylaý departamentiniń málimetinshe, 5 adamǵa «kene ensefalıti» dıagnozy qoıylyp, aýrýhanaǵa jatqyzylǵan. Úsheýi Petropavlda, ekeýi Qyzyljar aýdanynda tirkelgen 5 naýqastyń da jaǵdaıy turaqty, qaıtys bolǵandar joq.