Búgin Memlekettik qyzmet isteri agenttiginiń tóraǵasy Darhan Jazyqbaı Memleket basshysynyń tikeleı bastamasymen qolǵa alynǵan Prezıdenttik jastar kadr rezervine kezekti irikteýdiń talaptaryn túsindirý maqsatynda memlekettik jáne kvazımemlekettik sektordyń jas mamandarymen kezdesti, dep habarlaıdy Egemen.kz.
Is-sharaǵa 250-ge jýyq ortalyq memlekettik organdar men oǵan qarasty uıymdardyń, jergilikti atqarýshy organnyń, kvazımemlekettik sektordaǵy kompanııalardyń qyzmetkerleri, sondaı-aq Prezıdenttik jastar kadr rezerviniń músheleri qatysty.
MQIA tóraǵasy Prezıdenttik jastar kadr rezervine kezekti irikteýiniń bastalýy, bıylǵy irikteýdiń ereksheligi men kezeńderi týraly aıtty. Ol aldyńǵy jyldary ótken irikteý tájirıbesi jastar arasynda joǵary tanymaldylyqqa ıe bolǵanyn atap ótip, memlekettik basqarý júıesine jańa kadrlar men talanttardy tartý mańyzdylyǵyna toqtaldy.
«Memleket basshysy atap ótkendeı, «Jastar kadr rezervi – memlekettiń rezervi». Rezervti qalyptastyrýdaǵy basty maqsat – kókiregi oıaý, kózi ashyq jastardy memlekettik basqarýǵa tartý, memlekettik apparat jumysyna jańa serpin berý, jastar úshin ashyq jáne tıimdi áleýmettik lıft qurý. Búginde memlekettik qyzmetke bilimdi, eńbekqor, Otanǵa qyzmet etýdi ózine paryz sanaıtyn jastar qajet», dedi Darhan Jazyqbaı.
Aǵymdaǵy jyly rezervke irikteý áleýmettik saıasat jáne azamattyq qoǵam, ınfraqurylymdy, ónerkásipti damytý jáne saýda saıasaty, ekonomıkalyq jáne qarjylyq saıasat, sıfrlandyrý, agroónerkásiptik keshen jáne qorshaǵan ortany qorǵaý, syrtqy saıasat jáne ınvestısııalar syndy memlekettik basqarýdyń 6 salalyq baǵyty boıynsha júrgiziledi.
Agenttik tóraǵasynyń aıtýynsha, bıylǵy irikteýdiń basty ereksheligi – ár baǵyt boıynsha kandıdattardyń birkelki sanyn qamtamasyz etý maqsatynda árbir kezeńde proporsıonaldy irikteý ótkizý. Rezervtiń ár salalyq baǵyty boıynsha kvotalar qarastyrylyp, irikteý sol salalyq baǵyt boıynsha ǵana júrgiziletin bolady. Bul ádis salalar arasyndaǵy teńgerimdi qamtamasyz etip, naqty baǵyttar boıynsha úmitkerlerdi irikteýdi qamtamasyz etedi.
Irikteýge jasy 35-ten aspaǵan, joǵary bilimi jáne 5 jyl jalpy jumys tájirıbesi bar, memlekettik tildi V1 deńgeıinen tómen emes meńgergen QR-nyń azamaty qatysa alady.
Qujattardy qabyldaý – 1-30 maýsym aralyǵynda pkrezerv.gov.kz resmı platformasynda onlaın rejımde júzege asyrylady. Irikteý 6 kezeńnen turady, onyń qorytyndysy boıynsha 50 adam Rezervke qabyldanady.
Kezdesýge arnaıy kelgen Prezıdenttik jastar kadr rezerviniń músheleri Sıfrlyq damý, ınnovasııalar jáne aeroǵarysh ónerkásibi mınıstrligi Jasandy ıntellekt jáne ınnovasııalar damytý komıtetiniń Tóraǵasy Ǵızzat Baıtursynov, Oqý-aǵartý mınıstrligi Balalardyń quqyqtaryn qorǵaý komıteti Tóraǵasynyń orynbasary Iýlııa Ovechkına, Halyqaralyq baǵdarlamalar ortalyǵynyń basqarma tóraǵasy Ádil Qusmanov jáne ózge de rezervshiler ózderiniń irikteýge qatysý tájirıbelerimen bólisip, joba talantty jastar úshin áleýmettik lıft jáne memlekettik qyzmette óz áleýetin kórsetýge zor múmkindik ekenin atap ótti.
Is-sharaǵa qatysqan jas mamandar irikteý máseleleri, irikteýdiń ashyqtyǵy men obektıvtiligin qamtamasyz etý jónindegi sharalarǵa qatysty suraqtar qoıdy.
Atap ótý kerek, buǵan deıin 2019, 2021 jáne 2023 jyldary ótken irikteýlerge qatysýǵa jalpy 60 myńnan astam adam qyzyǵýshylyq tanytty. Irikteýler qorytyndysy boıynsha rezervke 400 adam qabyldandy. Búginde olardyń 318-i jaýapty qyzmetterge taǵaıyndalyp, ekonomıkanyń túrli salalarynda elimizdiń damýyna óz úlesterin qosyp jatyr.
Rezervshilerdiń 167 - ortalyq memlekettik organdarda, 37 - jergilikti atqarýshy organdarda, 62 - ulttyq kompanııalarda, 52 - ózge uıymdarda qyzmet atqaryp jatyr. Sondaı-aq 39 rezervshi saıası laýazymdarda, 3 - «A» korpýsynyń laýazymdarynda, 2 - Májilis depýtaty, 1 - máslıhat depýtaty bolyp qyzmet etip júr.