Munaıly óńirde sýbsıdııa máselesi sharýalardy alańdatatyn túıtkilge aınaldy. О́ıtkeni mal azyǵyn arzandatý maqsatynda beriletin sýbsıdııaǵa qol jetkize almaı otyr.
Atyraý oblysynyń kásipkerler palatasyna oblys ákimdiginiń «Atyraý oblysy boıynsha 2025 jylǵa arnalǵan aýylsharýashylyq mal azyǵynyń qunyn arzandatýǵa sýbsıdııalaý normatıvterin, sondaı-aq sýbsıdııa alý krıterıılerin, ótinim nysany men ótinimderdi qabyldaý merzimderin bekitý týraly» qaýlysynyń jobasy saraptama jasaýǵa túsken.
Kásipkerlerdiń quqyqtaryn qorǵaý jónindegi ýákildiń Atyraý oblysy sektor meńgerýshisi, oblystyq kásipkerler palatasy dırektorynyń orynbasary Sársenbaı Joldybaevtyń aıtýynsha, palata sarapshylary sharýalarǵa tólenýge tıis sýbsıdııalar mólsheri men talap etiletin normatıvter arasyndaǵy sáıkessizdikti anyqtaǵan.
«Jemshópti sýbsıdııalaý normatıvterin qalyptastyrý tártibi Aýyl sharýashylyǵy mınıstrliginiń 2019 jylǵy 15 naýryzdaǵy №108 buıryǵy negizinde júzege asyrylýy tıis. Osy buıryqtyń 10-tarmaǵyna sáıkes standarttar aýyl sharýashylyǵy salasyndaǵy mamandandyrylǵan ǵylymı mekemeniń usynysy negizinde jergilikti atqarýshy organdardyń qaýlysymen bekitiledi. Taldaý kórsetkendeı, oblystyq aýyl sharýashylyǵy jáne jer qatynastary basqarmasy ǵylymı mekemelerdiń jemniń naryqtyq baǵasynyń ósýine baılanysty qosymsha zertteýler júrgizýi qajettigi týraly usynystaryna qaramastan, iri qaranyń bireýine 270 myń teńge sýbsıdııa bóletin jobany bekitýge usynyp otyr. Bul standart qazirgi naryqtyq jaǵdaıǵa sáıkes kelmeıdi. Tipti 2021 jylǵy standarttan da tómen. Mundaı standart aýyl sharýashylyǵymen aınalysatyn kásipkerlerge ekonomıkalyq turǵydan tıimsiz, ári salanyń damýyna keri áserin tıgizedi», deıdi S.Joldybaev.
Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń ókili Aıgúl Qazambaevanyń aıtýynsha, Atyraý oblystyq aýyl sharýashylyǵy jáne jer qatynastary basqarmasynyń mamandary byltyr baılanysqa shyqqan. Belgili bir aımaq úshin standarttardy daıyndaýǵa qosymsha zertteý jumystary qajet. «Biz jalpy standarttardy usyndyq. Bıyl memlekettik organnan baılanys ta, suranys ta bolǵan joq», dedi A.Qazambaeva.
Aýyl sharýashylyǵy jáne jer qatynastary basqarmasynyń bas mamany Jasulan Sultanǵalıevtiń deregine súıensek, 2020 jyldan beri jemshópke bólinetin sýbsıdııa kólemi eki esege ósken. Máselen, 2020 jyly sýbsıdııa kólemi iri qaranyń bir basyna 120 myń teńgeni qurady.
«Aýyl sharýashylyǵy mınıstrliginiń buıryǵyna 2021 jyly ózgertýler engizildi. Osyǵan baılanysty S.Seıfýllın atyndaǵy Qazaq agrotehnıkalyq ýnıversıtetiniń zertteý esebine súıenip, qaýlymen 240 myń teńge kóleminde sýbsıdııa belgilendi. Osy sýbsıdııa túrin bizdiń oblysta tek «Pervomaıskıı» ǵana alyp otyr. Byltyr buıryqqa taǵy da ózgertýler engizildi. Sondyqtan S.Seıfýllın atyndaǵy ýnıversıtetke qaıtadan suranys jiberdik. Olar óz jaýabynda ǵylymı zertteý jumystaryn júrgizý qajettigin, biraq sýbsıdııa alýshylardyń shaǵymdary bolmaǵan jaǵdaıda qaýlyny bekitýge bolatynyn atap kórsetti. Sol sebepten, biz bul standartty 2025 jylǵa deıin bekittik», dep málim etti J.Sultanǵalıev.
Alaıda, Atyraý oblysy kásipkerleri palatasynyń ókilderi oblystyq aýyl sharýashylyǵy jáne jer qatynastary basqarmasynyń bul ustanymymen kelispeı otyr. Palata ókilderiniń pikirinshe, sýbsıdııa mólsherin bekitý kezinde birneshe jaıtqa nazar aýdarylýǵa tıis. Birinshiden, naryqtaǵy jaǵdaı eskerilip, sýbsıdııa mólsherin anyqtaıtyn standart naqty eseptelýi qajet. Ekinshiden, sýbsıdııa mólsheri jyl saıyn ózgertilgeni jón. Eń bastysy, memleket tarapynan beriletin sýbsıdııa tolyǵymen tólenýi kerek.
Atyraý oblysy