Etnofestıval qala kúnine oraı uıymdastyryldy. Sharada Astana saıabaǵynda ulttyq buıym, aspaptar jasaıtyn sheberler, zergerler, sýretshiler, qolónershiler qolymen jasalǵan buıymdar men sýretter qoıylyp, aspazdar ulttyq taǵam túrlerin usyndy. Kópshiliktiń nazary tary daqylynan jasalǵan 50-den astam taǵam túri men urshyq ıirgen ájelerge tústi, dep habarlaıdy Egemen.kz.
Bıylǵy mamyrda qala ákimdigi Aqtóbe qalasynyń 156 jyldyǵyn turǵyndardyń basyn qosatyn tanymdyq shara retinde ótkizý týraly bastama kótergen bolatyn. Bastama júzege asyp, etnofestıvalge qatysýǵa múmkindik alǵan on eki aýdannyń on saýsaǵynan óneri tamǵan sheberleri men qolónershileri buryn usynylmaǵan buıymdaryn qala merekesinde jarqyrata kórsetti. Ásirese, «Toqyma patı» alańynda 156 áje urshyq ıirý, jún tútý men kıiz basýdan sheberlik sabaǵyn ótkizip, jastarǵa ónege kórsetti. Qazirgi kezde qoldanystan shyǵyp bara jatqan urshyq ónerin qaladaǵy «Dástúrge jol» qoǵamdyq uıymy men «Ájeler ansambliniń» músheleri jańǵyrtyp júr.
«Geolog» mádenıet úıinde qurylǵan «Sholpy» qyzdar klýbynyń músheleri shash órýdiń túrlerin kórsetti. Oǵan 156 burymdy qyz qatysyp, arasyndaǵy eń shashy uzyn qyz «Burymdy qyz –2025» kýbogyn jeńip aldy. «Ulttyq aspaptar alańynda» qazaqtyń keń tanylmaǵan ulttyq aspaptary nasıhattalsa, qolónershiler qyshtan qumyra jasaýdan sheberlik saǵatyn ótkizdi. Qonaqtar Oıyl aýdandyq óner jáne ólketaný murajaıynan ákelingen taryshy Shyǵanaq Bersıevtiń eńbek quraldary men basqa da eksponattarmen tanysty. Kórmege Shyǵanaq zvenosy ósirgen aq tarynyń túrleri qoıyldy.
Aqtóbe oblysy