Jıynǵa Qorǵanys mınıstrliginiń jetekshi quramymen qatar, mektep ujymdary, ardagerler men kýrsanttar qatysty
Qatysýshylardy Qorǵanys mınıstriniń tárbıe jáne ıdeologııalyq jumystar jónindegi orynbasary general-maıor Shaıh-Hasan Jazyqbaev quttyqtap, mekemeniń qyzmetine toqtaldy. Ol áskerı-tehnıkalyq mektepterdiń negizgi mıssııasy – jumyldyrý resýrstaryn tolyqtyrý maqsatynda áskerge shaqyrylýshylar men áskerı daıyndyqtan ótken rezervti sapaly daıarlaý ekenin atap ótti. Sonymen qatar, mekemeniń baı tarıhy men onyń el qaýipsizdigin qamtamasyz etýdegi róline nazar aýdardy.
General-maıor Shaıh-Hasan Jazyqbaev jumysshy mamandyqtar jyly aıasynda áskerı-tehnıkalyq mektepterdiń sany artyp kele jatqanyn jetkizdi. Qazirgi ýaqytta qorǵanys salasynyń, memlekettiń tıimdi damýyna qajetti mamandardy daıarlaýdaǵy jaýapkershiligi zor ekenin aıtty.
Áskerı-tehnıkalyq mektepter Aqtóbe, Almaty, Atyraý, Qaraǵandy, Kókshetaý, Qyzylorda, Pavlodar, Semeı, Taldyqorǵan, Taraz, О́skemen, Oral jáne Shymkent qalalarynda jumys isteıdi. Bul mekemeler azamattardy atqysh, mergen, granata laqtyrýshy, barlaýshy, ushqyshsyz ushý apparattarynyń operatory, «B, C, C1» sanatyndaǵy júrgizýshi, MTLB mehanık-júrgizýshisi, radıotelegrafıst syndy áskerı eseptik mamandyqtar boıynsha daıarlaıdy. Ýaqyt talabyna saı oqý baǵdarlamalary men mamandyqtar tizimi únemi jańartylyp otyrady.
- Bizdiń mekeme qorǵanys jáne azamattyq beıindegi mamandardy daıarlaý júıesindegi mańyzdy býyny, kásibıliktiń, patrıotızmniń jáne Otanǵa adaldyqtyń tiregi boldy. Biz júrip ótken jol – beriktiktiń, turaqtylyqtyń jáne yntymaqtastyqtyń joǵary sapasynyń dáleli. Shırek ǵasyr – biz oqyǵan, oqytqan, jetildirgen jáne kásibı mádenıetti qalyptastyrǵan, laıyqty azamattardyń jańa býynyn, memleketimizdiń qorǵaýshylaryn tárbıelep shyǵarǵan ýaqyt, - dedi óz sózinde QR Qorǵanys mınıstrligi Áskerı-tehnıkalyq mektebiniń bas dırektory general-maıor Ádilbek Aldabergenov.
Mereıtoı aıasynda birqatar áskerı qyzmetshiler, mamandar men ardagerler «El qorǵany» vedomstvolyq medalimen, sondaı-aq Qorǵanys mınıstri men Áskerı-tehnıkalyq mektep bas dırektorynyń atynan marapattarmen jáne baǵaly syılyqtarmen marapattaldy.
Saltanatty is-shara Ulttyq áskerı-patrıottyq ortalyqtyń shyǵarmashylyq ujymy daıyndaǵan konserttik baǵdarlamamen aıaqtaldy.
Damıra Tólegen
EUÝ stýdenti