26 mamyrda Mádenıet jáne aqparat mınıstri Aıda Balaeva Qytaı Halyq Respýblıkasynyń Qazaqstan Respýblıkasyndaǵy Tótenshe jáne О́kiletti Elshisi Han Chýnlınmen kezdesti.
Kezdesý barysynda Aıda Balaeva Qazaqstan mádenı-gýmanıtarlyq salada, onyń ishinde óner, kıno jáne teatr, medıa-resýrstardy damytý baǵytynda yntymaqtastyqty nyǵaıtýǵa múddeli ekenin atap ótti. Sonymen qatar mınıstr atalǵan baǵyttar boıynsha jetken jetistikter jaıly sóz qozǵap, sonyń nátıjesinde Qazaqstan men Qytaı arasyndaǵy áriptestik pen ózara túsinistik jańa deńgeıge kóterilgenin de tilge tıek etti.
Máselen, 2024 jyly QHR Tóraǵasy Sı Szınpınniń Qazaqstanǵa memlekettik sapary aıasynda elder arasynda Radıo men televızııa salasyndaǵy yntymaqtastyq týraly memorandýmǵa qol qoıyldy.
Sondaı-aq qyrkúıek aıynda Tıanszın qalasynyń mýzeıinde Qazaqstan Respýblıkasynyń Ulttyq mýzeıi men Qytaıdyń Mádenı jádigerler ortalyǵy birlesip uıymdastyrǵan «Altyn adam jáne Uly dala» atty halyqaralyq kórmeniń saltanatty ashylýy ótti.
Kásibı óner uıymdaryn biriktirý bastamasy aıasynda Ábilhan Qasteev atyndaǵy QR Memlekettik óner mýzeıi Jibek joly mýzeıleri men galereıalary Halyqaralyq alıansyna múshe boldy. 5 maýsym kúni mýzeıde Qytaı Ulttyq kórkemóner jaýharlary usynylatyn «Qytaı óneriniń oı-maqsattary» kórmesi ótedi. Kórmege keskindeme, grafıka jáne músin janryndaǵy 50-ge jýyq týyndy kórermen nazaryna usynylady.
Sonymen qatar, 2025 jylǵy 30 mamyrda «Astana Opera» teatrynda Qytaıdyń kórnekti kompozıtory ári skrıpkashysy Sıan Sınhaıdyń 120 jyldyǵyna arnalǵan konsert uıymdastyrylady.
Al maýsym aıynyń ortasynda QR Ulttyq mýzeıinde Qytaı Jibek Ulttyq mýzeıiniń qoldaýymen «Jibek jáne Jibek joly: Qytaıdan Qazaqstanǵa» atty halyqaralyq kórme ótedi. Kórmede matalar kórsetilip, shaı dástúrleri kópshilik nazaryna usynylady.
Mınıstrdiń aıtýynsha, memleketaralyq yntymaqtastyqtyń basym jobalarynyń biri – mádenı ortalyqtar qurý. Bul mádenı baılanystardy nyǵaıtyp, tájirıbe almasýǵa jáne dostyq qarym-qatynasty damytýǵa jol ashady.
QHR-dyń Tótenshe jáne О́kiletti Elshisi Han Chýnlın myrza da yntymaqtastyqty nyǵaıtý qajettigin sóz etti. Atap aıtqanda, Qytaı aqparattyq saıasat, aýdarma isi jáne baspa salalaryn damytýǵa qyzyǵýshylyq tanytyp otyr. Sonymen qatar, Chýnlın myrza qazaqstandyq ártisterdi Qytaıda ótetin festıvalderge jıi qatysýǵa shaqyrdy.
Otyrys barysynda qatysýshylar aqparat salasyndaǵy is-sharalar josparyn da talqylady. Naqtyraq aıtqanda, BAQ yntymaqtastyq forýmy, Sı Szınpın kitabynyń tusaýkeseri, sondaı-aq «Qytaı – Ortalyq Azııa» aqparat agenttikteriniń forýmy jaıynda sóz boldy.
Kezdesý sońynda Aıda Balaeva Qazaqstan tarapy yntymaqtastyqqa árdaıym ashyq ekenin aıtyp, dostyqty nyǵaıtý men qarym-qatynasty damytýǵa baǵyttalǵan eki el arasyndaǵy birlesken jobalarǵa qoldaý jalǵasatynyn tilge tıek etti.