Rımde (Italııa) zorlyq ekstremızmge qarsy is-qımyl jónindegi halyqaralyq konferensııanyń aǵa laýazymdy tulǵalarynyń úılestirý keńesi ótip, oǵan 65 memleket pen 10 halyqaralyq uıymnyń ókilderi qatysty.
Is-shara barysynda atalǵan máselege qatysty jahandyq óńirlik konferensııalardyń qorytyndylary men aldaǵy qyrkúıekte Nıý-Iorkte memleketter basshylarynyń qatysýymen ótetin sammıttiń kún tártibi talqylandy. Qazaqstandyq delegasııany Syrtqy ister mınıstrliginiń erekshe tapsyrmalar jónindegi elshisi Tımýr Orazaev basqardy. Qazaqstandyq tarap is-shara qatysýshylaryn bıylǵy 29-30 maýsymda Astanada ótken Ortalyq jáne Ońtústik Azııa elderi boıynsha óńirlik konferensııa týraly habardar etti. Atap aıtqanda, osy tektes qaterlerdiń ósimine jáne olardyń lańkestik áreketterge aýysyp ketýine yqpal etetin jaǵdaılarǵa jol bermeýge baǵyttalǵan úılestirilgen is-qımyldar ázirleý jáne ekstremızmge qarsy naqty sharalar týraly áńgime qozǵaldy. Delegattar ekstremızm men lańkestikti bir-birine uqsas qubylystar retinde qarastyrǵan jón deı kelip, qazirgi zamannyń osy basty jahandyq qaýip-qaterlerine qarsy qımyldar úshin jaýapkershilik árbir memlekettiń moınynda bolýy kerek degen pikir bildirdi. Bul qaýip-qaterlerge qarsy turýdyń birlesken qımyldary, sonyń ishinde lańkestik uıymdardyń jáne olardy demeýshilerdiń biryńǵaı tizbesi jasalýy qajet ekeni atap ótildi. Bul úderiske bıylǵy maýsym aıynda Astanada jahandyq konfessııaaralyq jáne mádenıetaralyq únqatysýdy nyǵaıtý maqsatynda ótken Álemdik jáne dástúrli dinder kóshbasshylary V seziniń qosqan úlesi erekshe ataldy. Qazaqstandyq dıplomat sammıt ıdeıasyn qoldap, osy saladaǵy ekstremızm men lańkestikke qarsy yntymaqtastyqty jalǵastyrýǵa elimizdiń daıyn ekendigin bildirdi.
«Egemen-aqparat».