Densaýlyq saqtaý mınıstrligi men Áleýmettik medısınalyq saqtandyrý qory kishkentaı pasıentter arasynda «Dárigerge alǵys – balalardyń kózimen» atty chellendj bastady. Aq jeleńdilerdi qoldaýǵa shaqyratyn bastamaǵa ún qosqan turǵyndar múmkindikti paıdalanyp, óz dárigerlerine alǵys aıtýdy qazirden bastap ketti.
Chellendjge qatysý úshin balalar ata-analarynyń kómegimen áleýmettik jelige «Dáriger – balalardyń janashyry» heshtegimen sýret nemese beınematerıal jarııalaıdy. Odan ári dárigerge ne úshin alǵys aıtqysy keletinin baıandaıdy. Balalarǵa qorǵan bolyp, alǵys arqalaǵan dárigerge degen iltıpatyńyzdy 10 maýsymǵa deıin jalǵasatyn chellendjde jarııalap úlgerińiz. Eń úzdik jumystar Densaýlyq saqtaý mınıstrliginiń áleýmettik jelidegi paraqshalarynda jarııalanady.
Densaýlyq saqtaý mınıstrligi Prezıdent tapsyrmasymen ana men bala densaýlyǵyn saqtaý máselesin basty orynǵa qoıady. Búginde emhanalarda áıelderdiń júktilikti josparlaý jumystary nyǵaıyp keledi. Árbir áıel júktilikti josparlaý kezinde profılaktıka úshin medısınalyq tekserýden ótýi kerek. Muny jergilikti densaýlyq saqtaý uıymdary úılestiredi. Dárigerler balany týǵanǵa deıin birneshe márte skrınıngten ótkizip, damýyn baqylaıdy. Osy baǵyttaǵy jumystardy barynsha sapaly úılestirý maqsatynda ÝDZ mamandarǵa joǵary talap qoıylǵan. Mınıstrlik, medısına uıymdary ÝDZ dárigerlerin kóbeıtýge, biliktiligin arttyrýǵa den qoıady. Sebebi olar ana men bala densaýlyǵyndaǵy qandaı da bir kináratty qalt jibermeýge tıis. Damýynda aqaýy bar balalar oblys ortalyǵyndaǵy nemese iri qaladaǵy ortalyqtarǵa joldama arqyly bara alady. Ondaǵy dárigerler ana men balany qalaıda aman alyp qalýdyń qam-qareketin jasaıdy. Densaýlyq saqtaý mınıstri Aqmaral Álnazarova balalardyń densaýlyǵyn saqtaý maqsatynda iske asyp jatqan jumystardy baıandady.
«Elimizde jyl saıyn 360 myńnan astam sábı dúnıe esigin ashady. Olardyń densaýlyǵyn ómiriniń alǵashqy sátterinen bastap 4 myńnan astam pedıatr, 1 myńnan astam neonatolog, jergilikti praktıka dárigerleri muqııat qadaǵalap, baqylaýda ustaıdy. Árbir bala týǵan sátinen bastap medısınalyq baqylaýǵa alynady. Qazir 7 mıllıonnan astam bala tegin medısınalyq kómekke qol jetkizse, jyl saıyn 2 mıllıonnan astam bala skrınıngten ótedi. 4,5 mıllıonnan astam bala profılaktıkalyq qarap-tekserýmen qamtylady. 1,5 mıllıonnan astam balaǵa ımmýndaý júrgiziledi. Mektep jasyndaǵy balalarǵa da erekshe nazar aýdarylady. Búginde árbir mektep belgili bir emhanaǵa bekitilgen. Onda 6,5 myńnan astam medısınalyq pýnkt jumys isteıdi. Bul balalardyń densaýlyǵyndaǵy máselelerdi der kezinde anyqtap, kómek kórsetip, aýrýlardyń aldyn alýǵa múmkindik beredi. Men, pedıatr-dáriger jáne mınıstr retinde, balanyń densaýlyǵy – bul onyń tolyqqandy damýynyń, ómirdegi jetistiginiń, búkil ulttyń bilimi men kúshiniń negizi ekenin aıtqym keledi», dedi A.Álnazarova.
Bıyldan bastap Memleket basshysy Qasym-Jomart Toqaevtyń tapsyrmasymen elimizdegi mektepterde tamaqtanýdyń jańa ulttyq standarty engizilip jatyr. Munda mamandardyń ǵylymı usynymdary ósip kele jatqan balanyń qajettilikteri men salamatty ómir salty qaǵıdattary negizinde ázirlengen. Osyǵan qosa qazir «Bolashaqqa – saý tispen» baǵdarlamasy sheńberinde elimizdegi barlyq mektepte mindetti stomatologııalyq qarap-tekserý men tisjegi damýynyń aldyn alý sharalary engizilgen. Bir sózben aıtqanda, balanyń deni saý, myǵym bolyp ósýine bar jaǵdaı jasalǵan. Kúndelikti qym-qýyt tirshiliktiń qamymen júrgende osy kól-kósir jumysty, ásirese, dárigerlerdiń esil eńbegin baǵalaı bermeımiz. Shyn máninde, aq jeleńdiler bala qursaqta jatqannan densaýlyǵyn baqylap, qorǵan bolady. О́mir súrýge dármensiz dep topshylaǵan talaı balany ajaldan arashalap qaldy. Osyndaı, óz isin jetik biletin, janashyr dárigerler árbir óńirde bar. Endeshe, sol meıirban jandarǵa alǵys aıtýdy umytpasaq, ıgi.