Keıingi jyldardaǵy sý tapshylyǵy Syr dıqandaryn tyǵyryqqa tirep otyr. Bastapqyda darııa arnasyna qaraılap, ár egis maýsymyn alańmen ótkizetin sharýalar keıinnen kúrish kólemin azaıtyp, egisti ártaraptandyrýǵa den qoıa bastady. Osy kúni dıqandar alqapty tegisteý arqyly sý únemdeýge kóshti.
Jýyrda ǵana jergilikti sharýalarmen kezdesýde Sý resýrstary jáne ırrıgasııa mınıstri Nurjan Nurjigitov bıyl óńirde 60 myń gektarǵa jýyq egis alqaby lazermen tegistelgenin aıtyp ótti.
О́tken jyly 55 myń gektardy lazermen tegisteý nátıjesinde 200 mln tekshe metr sý únemdelip, osyǵan deıin gektaryna 40-55 sentnerden aınalyp kelgen ortasha ónim kólemi 70-80 sentnerge deıin ulǵaıǵan. Degenmen qymbat tehnıkaǵa árkimniń qoly jete bermeıtini taǵy bar. Osy kúni oblysta 100 myń gektarǵa deıin egistik alqapty qamtýǵa múmkindik beretin osyndaı 123 tehnıka bar.
Osydan da Úkimet aýyl sharýashylyǵy kooperatıvteriniń lazermen tegistegishterdi satyp alý shyǵyndaryn 50%-ǵa deıin sýbsıdııalaýǵa kóshti.
«Sizdermen eń alǵash kezdesýde aıtqan usynystaryńyz boıynsha boıynsha biz kooperatıvterge arnalǵan sýbsıdııa mólsherin 25%-dan 50%-ǵa deıin ulǵaıttyq. Osyǵan deıin sýbsıdııa egistik alqaby 200 gektardan asatyn sharýashylyqtarǵa ǵana tólenedi degen talap bar edi. Biz Aýyl sharýashylyǵy mınıstrligimen birlese otyryp, bul shekteýdi de alyp tastadyq», dedi Sý resýrstary jáne ırrıgasııa mınıstri.
Oblystyń soltústiginde dán sebý keshegi aptap ystyqtarmen tuspa-tus kelip, sýarý maýsymy jyldaǵydan erterek bastaldy. Kóktem bastalǵaly kókten tamshy da tambaǵan óńirde bıyl sýǵa suranys eselep artatyny anyq. Búginde oblysqa Shardara sý qoımasynan sekýndyna 600 tekshe metr sý jiberilip jatyr.
«Prezıdenttiń osy baǵyttaǵy «kóleńkeli naryqty» joıý jóninde naqty tapsyrma bergenin bilesizder. Osyǵan baılanysty mınıstrlik birneshe mańyzdy sheshim qabyldady. Endi «Qazsýshar» fılıaldary kelisimshartqa otyrǵan sharýa qojalyqtaryna ǵana sý beredi. Zańsyz sý alýǵa ruqsat joq. Jańa Sý kodeksinde de osy máselege basa nazar aýdarylyp, jaýapkershilik kúsheıtildi. Qujat 10 maýsymnan bastap kúshine enedi», dedi mınıstr.
Jalaǵash aýdanynda ırrıgasııalyq jáne drenajdyq júıelerdi qaıta jańǵyrtý jumystary aıaqtalyp otyr. Barlyǵy 1 362,2 shaqyrym kanal qaıta jańartylyp, 14 617 shaǵyn gıdrotehnıkalyq nysan aýystyrylyp, jańadan salynypty. Sondaı-aq 327,86 shaqyrym kollektor men 151 baqylaý uńǵymasy qalpyna keltirilgen.
Osy jumystar nátıjesinde jalpy kólemi 15,1 myń gektar aýyl sharýashylyǵy alqaptaryn sýmen jabdyqtaý jaǵdaıy jaqsaryp, sýarmaly jerler tolyq ıgerildi. Sý shyǵynyn 30%-ǵa deıin azaıtýǵa múmkindik beretin osy joba arqyly jylyna shamamen 95 mln tekshe metr sý únemdeledi.
Jergilikti sharýa qojalyqtary da kóp jyldan beri aıaqsýmen qamtý baǵytyndaǵy bul jumysqa oń baǵa berip otyr. Olardyń aıtýynsha kanaldardy tazartyp, shlıýzder ornatý arqasynda sý jetkizý jaǵdaıy 35-40%-ǵa jaqsarǵan.
Mınıstrliktiń málimetinshe, Dúnıejúzilik bankpen birlesken ırrıgasııalyq jáne drenajdyq júıelerdi jetildirý jobasynyń ekinshi kezeńi aıasynda osyndaı jumystar Almaty, Jambyl jáne Túrkistan oblystarynda da júrgizilip jatyr. Osynyń arqasynda 105 myń gektardan astam jerdiń sýarmaly jaǵdaıy jaqsarady. Joba shamamen 86%-ǵa aıaqtalyp tur. Qazirdiń ózinde 79,15 myń gektar egistikke sý jetkizý jaqsaryp, jylyna 201,8 mln tekshe metr sý únemdeýge jaǵdaı jasalypty.
Syrda bıyl 80,9 myń gektarǵa egý josparlanǵan. Qazir osy kólemniń 51,9 myń gektary egilip, 41,8 myń gektary sýǵa bastyrylypty.
QYZYLORDA