Jaqynda serýendep júrgenimde, dosym tańǵajaıyp tabıǵat qupııasyn aıtty. Buryn estimeppin. Ol – sekvoııa aǵashtarynyń erekshe ósý strategııasy. Muny ishimnen qarjylyq strategııaǵa aınaldyryp aldym, ózimshe…
Sekvoııalar álemdegi eń alyp aǵashtar. Olardyń bıiktigi 95 metrge jetip, dińiniń qalyńdyǵy 12 metrdi quraıdy. Bul aǵashtar myńdaǵan jyldar boıy tirshiligin saqtap, jelge, daýylǵa qarsy tura alady. Biraq eń qyzyǵy – olardyń tamyr júıesi. Oılańyzshy, osyndaı alyp aǵashtardyń tamyrlary jerge tek 2-3 metr tereńdikke ǵana ketedi. Iаǵnı, olar alyp bıiktigine qaramastan, jer astyna tereńdemeıdi.
Sonda olar qalaı qulamaıdy? Jaýaby – birlik pen qoldaýda. Sekvoııalar tamyrlaryn kóldeneń baǵytta taratyp, kórshiles aǵashtardyń tamyrlarymen tyǵyz baılanysady. Olar bir-birine súıenip, ortaq júıe quryp, bir-birin qoldaıdy. Bul strategııany qarjy álemine de qoldanýǵa bolady. Kóptegen adamdar baı-qýatty bolýdy, ınvestısııany jeke is dep oılaıdy. Biraq shyn máninde, baılyq pen turaqtylyqqa jetý úshin senimdi qarjylyq jeli, qoldaý kórsetetin qaýymdastyq qajet.
Mysaly, dıversıfıkasııa tamyrlardy keńge jaıý. Sekvoııalar tamyrlaryn jan-jaqqa taratady. Sol sııaqty, siz de ınvestısııalaryńyzdy ártaraptandyrýyńyz kerek. Jyljymaıtyn múlik, aksııalar, oblıgasııalar, altyn bárin bir jerge salmańyz. Baılanysqa mán berý. Jeli qurý senimdi baılanys. Sekvoııalar kórshiles aǵashtarmen tamyrlaryn aıqastyrady. Qarjy áleminde bul senimdi adamdarmen, myqty komandalarmen jáne tájirıbeli keńesshilermen baılanys ornatý degen sóz. Bilikti sarapshylardan keńes alyp, olarmen turaqty baılanysta bolyńyz. Alysqa kóz tastaý. Uzaq merzimdi jospar – ǵasyrlar boıy saqtalý. Sekvoııalar myńdaǵan jyldar boıy ómir súredi. Investısııa da bir kúndik emes, uzaq merzimdi strategııa bolýy kerek. Ýaqyt – sizdiń eń jaqsy dosyńyz. Tabysyńyzdyń bir bóligin turaqty túrde ınvestısııalańyz.
Aıtpaqshy, dosym áńgimesiniń sońynda «Eger jalǵyz júrseń, jel qulatady. Birge júrsek taý da qulatpaıdy» deıdi. Sol durys aıtady-aý osy…