Astana halyqaralyq forýmynda BUU-nyń Azyq-túlik jáne aýyl sharýashylyǵy uıymynyń (FAO) bas dırektory Sıýı Dýnıýı Qazaqstanmen yntymaqtastyqtyń mańyzyn atap ótti. Ol elimizdiń agroazyq-túlik júıesin transformasııalaý jolyndaǵy jetistikterin joǵary baǵalap, áriptestikti taǵy 10 jylǵa uzartýǵa daıyn ekenin jetkizdi, dep habarlaıdy Egemen.kz.
Sıýı Dýnıýı FAO bıyl óziniń 80 jyldyǵyn atap ótetindigin eske saldy. Osyǵan oraı uıym basshysy álem elderin naqty ári tıimdi yntymaqtastyqqa shaqyrdy.
Sonymen qatar ol óz sózinde Ortalyq Azııany — geografııalyq, ekonomıkalyq jáne klımattyq toǵysqan aımaq retinde sıpattap, óńirde múmkindikterdiń kóp ekenin atap ótti.
«Qazaqstan — Ortalyq Azııadaǵy eń úlken memleket. Prezıdenttiń elimizdi óńirlik jáne jahandyq azyq-túlik habyna aınaldyrý týraly kózqarasy eldiń aımaqtyq deńgeıdegi kúshti yqpalyn kórsetedi», dedi Sıýı Dýnıýı.
FAO basshysy aýyldyq jerlerdegi jastardyń róline de erekshe toqtaldy. Uıym jastar jónindegi arnaıy komıtet pen basqarma quryp, bul baǵytty strategııalyq deńgeıge shyǵarǵanyn aıtty.
«Aýyldyq jerlerde mıllıondaǵan jas ómir súrip jatyr. Olardyń energııasy, kreatıvtiligi men tabandylyǵy turaqty bolashaqty qalyptastyrýda sheshýshi ról atqarady», dedi Sıýı Dýnıýı.
Sıýı Dýnıýı Qazaqstandy aımaqtyq kóshbasshy, ınnovasııany ilgeriletýshi el retinde tanyp, eldiń Ortalyq Azııadaǵy jáne jahandyq turaqty damý jolyndaǵy róline joǵary baǵa berdi.
«Qazaqstan — búkil óńir men álem úshin qaýipsiz ári ornyqty bolashaqty qalyptastyrýǵa yqpal etip otyrǵan mańyzdy seriktes», dep qorytyndylady BUU-nyń Azyq-túlik jáne aýyl sharýashylyǵy uıymynyń bas dırektory Sıýı Dýnıýı.