Ataqty ıtalııalyq jazýshy Karlo Kollodıdiń ańyzǵa aınalǵan «Pınokkıo» ertegisi qazaq tiline aýdarylady. Kishkentaı oqyrmanǵa arnalǵan klassıkalyq shyǵarmany tárjimalaýdy Almatydaǵy Italııa mádenıet ınstıtýty qolǵa almaq, dep jazady Egemen.kz.
Atalǵan ujymnyń bastamasymen jaqynda ǵana Italııa mýltfılminiń keıipkeri Djeronımo Stılton esimdi tyshqannyń «Italııaǵa saıahaty» da qazaq tiline aýdaryldy. Al «Pınokkıo» ertegisi oqyrmanǵa keler jyly jol tartpaq. Sondaı-aq bul shyǵarma Almatydaǵy №199 mektep-gımnazııasynda sahnalandy. Munda ınstıtýttyń qoldaýymen ıtalııan tilindegi balalar teatry jumys isteıdi. Oqýshylar Danteniń «Qudiretti komedııasynan» bastap Marko Polonyń shytyrmanǵa tola saıahatyna deıin qoıdy.
«Biz nebári 18 aı jumys istep kelemiz. Biraq Spazio D atty mańyzdy jobany júzege asyrdyq. Bul – dızaındaǵy ınnovasııalarǵa arnalǵan keńistik. Munda ıtalııalyq jáne qazaqstandyq avtorlardyń shyǵarmashylyǵy baılanys tapty. Ekijaqty áriptestikke basymdyq beremiz. Jaqyn arada Venesııa galereıasyna qatysqan qazaqstandyq sýretshilerdiń jumystaryna arnalǵan kórme uıymdastyramyz», deıdi Almatydaǵy Italııa mádenıet ınstıtýtynyń dırektory Edoardo Krısafýllı.
Aıta keteıik, atalǵan ınstıtýt ashylǵan sátten bastap birqatar mádenı sharany uıymdastyryp keledi. Solardyń biri – Astanadaǵy Ulttyq mýzeıde Leonardo da Vınchıdiń túpnusqa týyndylarynyń kórmesi. Mundaı is-sharany aýqymy jaǵynan tek Tokıoda ótetin kórmelermen salystyrýǵa bolady. Bul Qazaqstannyń mádenı seriktes retindegi mańyzyn aıqyndaıdy.