Semeı – elimizdegi medısınasy damyǵan jerdiń biri. Qazir adam densaýlyǵyn ońaltýda ıgi qadamdar jasalyp jatyr. Máselen, Abaı oblystyq perınataldyq ortalyǵynda jyl saıyn jeti myńnan astam bala dúnıege keledi. Olardyń shamamen 500-i shala týady, onyń ishinde kórý qabileti tómen patologııalardyń ulǵaıý qaýpi joǵary náresteler de bar. Eger ony ýaqytyly emdemese, bala zaǵıp bolyp qalýy múmkin.
Jýrda osyndaı qaterdiń aldyn alý maqsatynda atalmysh medısınalyq mekeme AYALA qaıyrymdylyq qory men Shyǵystústimet kompanııasynyń qoldaýymen zamanaýı oftalmoskop qurylǵysymen jabdyqtaldy. Bul endi qalada jańa týǵan sábılerdiń kórý qabiletin teserýge múmkindik berdi. Qazirdiń ózinde 500-den astam náresteniń kózderi tekserilgen.
Jańa týǵan sábılerdiń kózin tekserý – kóp jerde kún tártibinen tys qalyp jatatyn másele. Al Semeıdegi perınataldyq ortalyq bul baǵytty jolǵa qoıýǵa tyrysyp keledi. Qazir munda kózdiń ishki tor qabyǵyn tolyq zertteýge múmkindik beretin oftalmoskop qurylǵysy jumys istep tur. Ol perınataldyq ortalyq janyndaǵy katamnez kabınetine qoıylǵan. Iаǵnı bala úıine shyqqannan keıin de baqylaý jalǵasady.
– Buryn bul qurylǵy bolmaǵan kezde ata-analar sábılerin oblys ortalyǵynan syrtqa aparýǵa májbúr bolatyn. Endi tekserý de, em de osynda jasalady. Qazirdiń ózinde 500-den astam bala tekserýden ótti, – deıdi katamnez kabınetindegi dárigerler.
Demeýshiler shala týǵan balalarda jıi kezdesetin retınopatııanyń agressıvti túrin emdeýge qajetti «Lýsentıs» preparatynyń 15 ampýlasyn satyp alýǵa da qarjy bólip otyr.
– Abaı oblysynda dúnıege kelgen nárestelerdiń densaýlyǵyn saqtaýǵa jáne olardy kórý múmkindigin jaqsartýǵa úles qosqanymyzǵa qýanyshtymyz. Balalar densaýlyǵyn qorǵaýǵa baǵyttalǵan jobalar – elimizdiń turaqty damýyna qoldaý kórsetetin áleýmettik bastamalarymyzdyń mańyzdy bir bóligi, – deıdi kompanııa ókili Vıacheslav Iаkýpov.
2022 jyldan beri júzege asyp kele jatqan «Álemdi kóremin» jobasy aıasynda AYALA qory elimizdegi 23 medısınalyq mekemege 12 retınaldy kamera, 6 lazerlik qurylǵy, 17 oftalmoskop jáne 163 ampýla «Lýsentıs» preparatyn tabystady. Nátıjesinde Qazaqstanda shala týǵan náresteler arasyndaǵy kórý qabiletiniń joǵalý kórsetkishi aıtarlyqtaı tómendedi.
Abaı oblysy