Kanadada aptap ystyq pen qurǵaqshylyq saldarynan bolǵan joıqyn orman órtteri saldarynan Manıtoba provınsııasynda tótenshe jaǵdaı rejımi engizilgen. BILD agenttiginiń habarlaýynsha, stıhııalyq apattyń aýqymy óte keń. Qazirgi tańda 17 myńnan astam adam evakýasııalanǵan. Al jalyn sharpyǵan orman kólemi 200 myń gektardan asqan, bul sońǵy bes jyldaǵy ortasha kórsetkishten úsh ese kóp, dep habarlaıdy Egemen.kz.
Provınsııanyń premer-mınıstri Vaba Kınıý bul jaǵdaıdy «Manıtobanyń tarıhyndaǵy eń iri evakýasııa» dep atap ótip, eldi klımattyń ózgerýine jedel beıimdelýge shaqyrǵan.
Habarlanǵandaı, Flın-Flon shahterlik qalashyǵynda jaǵdaı óte kúrdeli. Qalaǵa aparatyn jalǵyz jol kepteliske toly, al jergilikti janarmaı beketterinde otyn taýsylǵan. Sondyqtan evakýasııa Kanada Qarýly kúshteriniń áskerı ushaqtary arqyly júrgizilip jatyr.
Aptap ystyq pen qurǵaq aýa raıy órttiń qarqynyn kúsheıtip otyr. Aýa temperatýrasy +37 gradýsqa jetken. Prerıılerdegi shóp pen topyraq ábden keýip, órt oshaqtary birinen keıin biri tutǵan.
«Buryn bir aımaqta ǵana órt bolatyn, qazir bir mezgilde birneshe aımaq birdeı órtenip jatyr. Bul — klımattyń ózgerýiniń aıqyn kórinisi», dedi Provınsııanyń premer-mınıstri.
Mamandar órttiń masshtabyn eskerip, jaǵdaıdyń odan ári ýshyǵýy múmkin ekenin eskertedi.