Astana halyqaralyq forýmynyń aıasynda «Jasandy ıntellekt dáýirindegi zııatkerlik menshik» taqyrybynda paneldik sessııa ótti. Jıyn barysynda jetekshi sarapshylar, saıasatkerler jáne sıfrlyq ekonomıkanyń ókilderi sıfrlyq transformasııa dáýirindegi zııatkerlik menshikti qorǵaý men retteýdiń ózekti máselelerin talqylady, dep habarlaıdy Egemen.kz.
Is-sharany Ádilet mınıstri Erlan Sarsembaev ashyp, Qazaqstannyń zııatkerlik menshikti ornyqty damý, ınvestısııalyq ahýaldy jaqsartý jáne ádil oıyn erejelerin qalyptastyrý úshin strategııalyq resýrs retinde qaraıtynyn atap ótti. Mınıstr jasandy ıntellekttiń jedel damýy aıasynda avtorlar, ázirleýshiler men qoǵam múddeleriniń tepe-teńdigin saqtaý máselesiniń mańyzyn erekshe atap ótti.
Paneldik sessııada Dúnıejúzilik zııatkerlik menshik uıymynyń (DZMU) Bas dırektory Daren Tang Qazaqstanǵa alǵashqy resmı saparymen kelgenin aıtty. Ol Qazaqstannyń osy saladaǵy bolashaqqa baǵdarlanǵan jáne teńgerimdi saıasat júrgizip otyrǵanyn, sonymen qatar jasandy ıntellekt pen sıfrlyq ekonomıka jaǵdaıynda zııatkerlik menshik júıelerin transformasııalaý boıynsha jahandyq pikirtalastarǵa belsendi qatysyp otyrǵanyn joǵary baǵalady.
Pikir almasýǵa Fransııa men Soltústik Makedonııanyń mınıstrleri, Malaızııa men Qytaıdyń delegasııalary, sondaı-aq halyqaralyq uıymdardyń ókilderi – Eýrazııalyq patent vedomstvosynyń Prezıdenti jáne Eýrazııalyq ekonomıkalyq komıssııanyń mınıstri qatysty. Úkimettik emes sektor atynan Meta kompanııasynyń ókili algorıtmdik shyǵarmashylyq pen generatıvti kontentke baılanysty avtorlyq quqyqtardy qorǵaý tetikteriniń jańa baǵyttaryn usyndy.
Sessııa zııatkerlik menshiktiń bolashaǵy týraly strategııalyq kózqarastardy ortaǵa salǵan mazmundy pikirtalas alańyna aınaldy. Onda avtorlyq quqyq uǵymdaryn qaıta qaraý, quqyqtardy qorǵaý men ınnovasııalardy yntalandyrýǵa arnalǵan ıkemdi retteý tetikterin ázirleýdiń ózektiligi atap ótildi.
Qazaqstan ádil ári tıimdi zııatkerlik menshik júıesin qalyptastyrý jolynda ashyq halyqaralyq dıalog júrgizý arqyly óziniń belsendi ustanymyn taǵy da dáleldedi.