«Habar» Agenttigi óziniń 30 jyldyq mereıtoıy aıasynda ótkir áleýmettik máselelerdi kóteretin derekti fılmder sıklyn jalǵastyryp keledi. Jańa týyndy – jýrnalıst Sábı Baıbosynovtyń avtorlyq jobasy «Stavka na jızn» – qumar oıyndarǵa táýeldilik, ıaǵnı lýdomanııa taqyrybyna arnaldy, dep habarlaıdy Egemen.kz.
Fılm bás tigem dep naǵyz lýdomanǵa aınalyp ketken naqty keıipkerlerdiń bastan keshken shytyrman oqıǵalaryna negizdelgen — olar aqsha, otbasy, densaýlyq, keıde úmitinen aıyrylǵan adamdar. Keıipkerler ádette eshkimge tis jarmaıtyn syrlarymen bólisedi. Bastan ótkergenin ashyq moıyndap, órmekshi toryndaı aıaýsyz júıege jutylyp ketken keıipkerdi kórgen kórermen – bul aýyr derttiń kazıno men býkmekerlik keńselerden asyp, smartfon arqyly jastardyń kúndelikti ómirine enip ketkenine kóz jetkizedi.
29 mamyrda ótken aldyn ala kórsetilimge depýtattar, blogerler, jýrnalıster, psıhologtar, qoǵam qaıratkerleri qatysty. Kórsetilimnen keıin oıyn bıznesi men lotereıa qyzmetin retteý boıynsha 2024 jyly qabyldanǵan zańnyń avtorlary, Parlament Májilisiniń depýtattary profılaktıkalyq jumystardy kúsheıtý jáne psıhologııalyq kómekke qoljetimdilikti arttyrý boıynsha óz usynystaryn aıtyp, belsendi talqylaý ótti.
«Qumar oıyndarǵa táýeldilik – adam taǵdyryn, bútindeı otbasylardy oırandap, ómirdi kúıretetin tragedııa. Eń qorqynyshtysy – bul dertke jastar jıi uryna bastady. Sondyqtan da mundaı taqyryptardy ashyq, shynaıy, kásibı túrde kóterý asa mańyzdy. «Stavka na jızn» fılmi – jaı ǵana hıkaıa emes, bul – úmit. Eger osy joba arqyly biz bir adamnyń ómirin qutqara alsaq – onda bul fılmniń beker bolmaǵany. Biz bul máseleni ashyq aıtyp, naqty ózgeristerge qol jetkizýimiz kerek», dedi Májilis depýtaty Edil Jańbyrshın.
«Biz lýdomanııaǵa qarsy baǵyttalǵan zańnyń qabyldanýyna uzaq ýaqyt boıy kúsh saldyq. Bul bastamamyzdy Memleket basshysy da qoldady. Ol naqty aıtty: Qazaqstanda 400 myńǵa jýyq adam qumar oıyndarǵa táýeldi. Bul – orasan zor kórsetkish. Biz bul adamdardy qıyndyqpen betpe-bet jalǵyz qaldyrýǵa quqymyz joq. Qazir mundaı jandarǵa keńes berý jáne psıhologııalyq qoldaý kórsetilýde. Biraq zań – tek qural ǵana. Eń bastysy – qoǵam sanasyn ózgertý», dedi Májilis depýtaty Elnur Beısenbaev.
«Bizdiń mıssııamyz — adamdardy shynymen tolǵandyratyn jáne qoǵamdy alańdatatyn ózekti máselelerdi qozǵaý. Bul taqyryptardy jarııa etip qana qoımaı, qoǵammen ashyq jáne tereń talqylaý qajet. «Stavka na jızn» derekti jobasy — qumar oıynnyń quldyǵyna túsken jandardyń janaıqaıy. Shyny kerek, mundaı ótkir máseleden biz shet qala almaımyz», dep atap ótti «Habar» Agenttiginiń Basqarma tóraǵasy Kemelbek Oıshybaev.
Joba buǵan deıin qoǵamdaǵy depressııa derti týraly fılmmen ashylǵan Agenttiktiń derekti jobalar sıklyn jalǵastyrdy. Bul baǵyttaǵy árbir jumys — jaı ǵana kıno emes, «jabýly qazan» kúıde qalǵan ótkir máseleler týraly únsizdikti buzýǵa arnalǵan áleýmettik manıfest.
«Stavka na jızn» derekti fılminiń telekórsetilimi 8 maýsym kúni saǵat 21:00-de «Habar» telearnasynda ótedi.