Pavlodar oblysynda Jumysshy mamandyqtar jyly aıasynda uıymdastyrylǵan «Innovation» respýblıkalyq hakatony óz jumysyn bastady. Aýqymdy sıfrlyq dodada 17 óńirden kelgen júzge jýyq stýdent jańa IT-ónimderdi jasap, kásibı daǵdylaryn kórsetip jatyr, dep habarlaıdy Egemen.kz.
Hakatonnyń basty maqsaty – IT salasyndaǵy jańashyl sheshimderdi tabý, tájirıbe almasý, jas mamandardyń kásibı jáne áleýmettik baılanysyn arttyrý. Qatysýshylar bir kún ishinde ıdeıadan bastap tolyqqandy prototıpke deıingi veb-ónim ázirlep, ony UX/UI-dızaın, ınnovasııa, fýnksıonaldyq jáne praktıkalyq mańyzdylyǵy syndy 10 túrli krıterıı boıynsha qorǵaýy tıis.
«Qatysýshylar ázirleıtin veb-qosymsha bilim berý uıymdaryna arnalǵan. Tapsyrmalar aldyn ala qupııa saqtalyp, respýblıkalyq deńgeıdegi táýelsiz sarapshylar toby daıyndaǵan», dedi Oblystyq bilim basqarmasy tehnıkalyq jáne kásiptik bilim berý bóliminiń basshysy Qarlyǵash Asaımova.
Aıta keteıik, hakatonǵa kelgenderdiń arasynda tájirıbeli jastar da bar. Máselen, Jezqazǵannan kelgen «ULWeb» komandasynyń múshesi Antonına Gazanıan IT salasynda qyzdardyń da bıik belesterdi baǵyndyra alatynyn dáleldegisi keletinin aıtqan.
«Baǵdarlamalaý – shydamdylyqty talap etetin sala. Qyzdar da tabandylyq tanyta alady. Aqshadan buryn óz qabiletimdi dáleldeý mańyzdy. Biz qoryqpaımyz – tek múmkindik kerek», dedi ol.
Oblystyq bilim basqarmasynyń aqparattyq tehnologııalar ortalyǵynyń jetekshisi Elnar Utubaevtyń aıtýynsha, qatysýshylarǵa úsh túrli tapsyrma usynylǵan.
«Olardyń qatarynda kásipkerlerge arnalǵan sýbsıdııa men granttardy irikteý, mansaptyq múmkindikterdi taldaý servısi jáne jańalyqtardyń shynaıylyǵyn tekserý quraly bar. Ár komanda ózine yńǵaıly bir jobany tańdaıdy. Jumystar 20:00-ge deıin IT-habta júrgiziledi, biraq túnde de jalǵastyrýǵa ruqsat etilgen», dedi jetekshi.
Aıta keteıik, búgin jeńimpazdardy marapattaý rásimi Ertis Promenade sahnasynda ótedi. Júlde qory – 3,5 mıllıon teńge quraıdy.