Qazaqstan Parlamenti Májilisiniń tóraǵasy Erlan Qoshanov pen О́zbekstan Olıı Majlısi Zań shyǵarý palatasynyń spıkeri Nýrıddın Ismoılov eki el arasyndaǵy parlamentaralyq yntymaqtastyqty keńeıtý máselelerin talqylady. Kezdesý barysynda taraptar saýda, ekonomıka, jasandy ıntellekt jáne mádenı-gýmanıtarlyq baılanystar salalaryndaǵy áriptestikti odan ári nyǵaıtý joldaryn qarastyrdy, dep habarlaıdy Egemen.kz.
Májilis spıkeri sońǵy jyldary Qazaqstan men О́zbekstan arasynda joǵary deńgeıdegi birqatar ózara sapar ótip, Odaqtastyq qatynastar týraly jáne Memlekettik shekarany demarkasııalaý týraly sharttar men 2024-2034 jyldarǵa arnalǵan strategııalyq áriptestik baǵdarlamasy sııaqty tarıhı qujattarǵa qol qoıylǵanyn atap ótti.
«Eki el prezıdentteriniń saıası erik-jigeri men danalyǵynyń arqasynda qazaq-ózbek baılanysy buryn-sońdy bolmaǵan bıik deńgeıge jetti. 100-den astam kelisimnen turatyn berik sharttyq-quqyqtyq baza qalyptasty. Olar bizdiń qarym-qatynastarymyzdyń barlyq salasyn qamtıdy. Yntymaqtastyqtyń jańa formatynyń ınstıtýsıonaldyq negizi qalandy. Prezıdentterimiz yqpaldastyqtyń basym baǵyttaryn aıqyndap, olardy ilgeriletý úshin naqty mindetter qoıdy», dedi Erlan Qoshanov.
Kezdesýde parlamentaralyq yqpaldastyqtyń damý qarqynyna erekshe mán berildi. Májilis tóraǵasy ekijaqty baılanysty nyǵaıtýda kópjaqty formattardyń mańyzyn aıtyp, Ortalyq Azııa elderiniń parlamentaralyq forýmy men áıelder dıalogynyń oń nátıjelerin atap ótti. Iske asyrylǵan bastamalar qatarynda Ortalyq Azııa memleketteriniń parlamentaralyq forýmy, Ortalyq Azııa elderi áıelderi dıalogy aıasyndaǵy is-sharalar jáne Tashkent qalasynda tabysty ótken Halyqaralyq Parlamentaralyq Odaqtyń 150-shi Assambleıasy bar.
О́z kezeginde, Nýrıddın Ismoılov parlamentaralyq dıalog elder arasyndaǵy senimdi nyǵaıtýdyń mańyzdy faktory ekenin jáne memleket basshylarynyń strategııalyq kelisimderin júzege asyrýǵa septigin tıgizetinin aıtty.
«Parlamentaralyq yntymaqtastyq keńesiniń formaty júıeli ári praktıkalyq máni zor. Parlamenttik dıalog memleketaralyq yntymaqtastyqqa ilesip qana qoımaı, sonymen qatar ony nyǵaıtýǵa, ekonomıka, áleýmettik sala, bilim berý jáne gýmanıtarlyq baǵyttaǵy birlesken bastamalardy ilgeriletýge yqpal etýge tıis degen pikirdemiz», dedi Olıı Majlıs Zań shyǵarý palatasynyń spıkeri.
Keńestiń kún tártibinde ekonomıkalyq, aqparattyq tehnologııalar men jasandy ıntellekt salalaryndaǵy seriktestiktiń bolashaǵy, sondaı-aq mádenı-gýmanıtarlyq jáne týrızm salalaryndaǵy birlesken jobalar talqylandy. Saýda aınalymyn 2030 jylǵa qaraı 10 mıllıard dollarǵa deıin ulǵaıtý mindeti qoıylyp, bul baǵytta zańnamalyq qoldaýdyń qajettigi aıtyldy.
Taraptar saýda-ekonomıka men agrarlyq salalardaǵy seriktestikti keńeıtý, mádenıet pen bilim baǵytyndaǵy yntymaqtastyqtyń joǵary qarqynyn saqtaý, ekologııa, energetıka jáne sý resýrstary máselelerin birlesip sheshý boıynsha eki el kóshbasshylary arasyndaǵy kelisimderdi iske asyrýda ilgerileýshilik bar ekenin atap ótti.
Sonymen qatar Májilis spıkeri kún tártibindegi basym baǵyttarǵa nazar aýdardy. Olardyń qatarynda Qazaqstan men О́zbekstan arasyndaǵy ekijaqty taýar aınalymyn 2030 jylǵa qaraı 10 mıllıard dollarǵa deıin ulǵaıtý mindeti de bar. Depýtattar osy mejege tezirek qol jetkizý úshin qajetti zańnamalyq sharalardy talqylady.
«Búginde Qazaqstan О́zbekstannyń eń iri úsh saýda seriktesiniń qataryna kiredi. Eki el arasyndaǵy taýar aınalymy jyl saıyn 4 mıllıard AQSh dollaryn quraıdy. Sońǵy jyldary ózara tıimdi yntymaqtastyqtyń negizgi qozǵaýshy kúshi ónerkásiptik kooperasııa, avtokólik qurastyrý, aýyl sharýashylyǵy jáne logıstıka bolyp otyr», dedi Erlan Qoshanov.
Atap aıtqanda, Darbaza – Maqtaaral temirjol jelisi, Qyzylorda – Úshqudyq kólik baǵyty jáne Tashkent mańyndaǵy logıstıka ortalyǵy sııaqty ınfraqurylymdyq jobalar iske asyrylýda. Sonymen qatar qonaqtarǵa Qazaqstan men О́zbekstan basshylarynyń tapsyrmalary negizinde júzege asqan birlesken zaýyttar men óndiristik keshender tanystyryldy.
Sonymen qatar О́zbekstan Respýblıkasy Olıı Majlısynyń Zań shyǵarýshy palatasy delegasııasyna Qazaqstan men О́zbekstan prezıdentteriniń tapsyrmalaryn oryndaý boıynsha júzege asyrylǵan ónerkásiptik jobalar tanystyryldy. Olardyń ishinde birqatar birlesken kásiporyn bar. Atap aıtqanda, Qostanaı oblysyndaǵy avtokólik zaýyty, Qaraǵandy oblysyndaǵy turmystyq tehnıka shyǵaratyn kásiporyn men Shymkent qalasyndaǵy medısınalyq buıymdar óndirisimen aınalysatyn zaýyt. Sondaı-aq mártebeli meımandarǵa Almaty mańynda ornalasqan Alatau City – ınnovasııalyq qalasy jáne «Jańa Jibek joly» boıyndaǵy jahandyq týrıstik ortalyǵy tanystyryldy. Jobanyń alǵashqy kezegin iske qosý 2030 jylǵa josparlanǵan. Alatau City jańa óndirister men jumys oryndarynyń ashylýyn qamtamasyz etip, óńirdegi damý ortalyǵyna aınalýǵa tıis.
Jumys saparynyń baǵdarlamasynda Ál-Farabı atyndaǵy Qazaq ulttyq ýnıversıtetiniń bazasynda ornalasqan Farabi HUB joǵary tehnologııalyq jobalar men startaptardy damytý platformasyna jáne Almaty qalasynyń mádenı nysandaryna barý josparlanǵan.