Múgedektigi bar adamdardyń zańdy quqyqtaryn qamtamasyz etý jáne olar úshin qoljetimdi ortany qalyptastyrý maqsatynda Aqmola oblysynda 1037 áleýmettik ınfraqurylym nysany tolyq beıimdeldi, dep jazady Egemen.kz aqparat agenttigi.
Qazirgi ýaqytta Qazaqstan Respýblıkasynda 2025-2030 jyldarǵa arnalǵan ınklıýzıvti saıasat tujyrymdamasy, «Amanat» partııasynyń 2023-2027 jyldarǵa arnalǵan jol kartasy jáne Memleket basshysynyń tapsyrmasy boıynsha ázirlengen «Halyqpen birge» jobasy iske asyrylýda.
«Amanat» partııasynyń jol kartasynda 2023-2027 jyldar aralyǵynda ınteraktıvti qoljetimdilik kartasyna (budan ári – Karta) engizilgen 42 myńnan astam nysandy beıimdeý boıynsha jumys kózdelgen. Jyl saıyn osyndaı obektilerdiń 20%-y beıimdelýi tıis. Osylaısha, 2023 jyly – Kartadaǵy obektilerdiń 20%, 2024 jyly – 40%, 2025 jyly – 60%, 2026 jyly – 80%, 2027 jyly – 100%-y beıimdeledi. Qazirgi ýaqytta el boıynsha 23206 nysan tolyqtaı beıimdelgen.
Búgingi tańda Aqmola oblysynda 1037 nysan beıimdeldi. 2025 jyldyń sońyna deıin taǵy 176 nysandy beıimdeý josparlanýda.
Beıimdelgen nysandardyń jalpy sanynan múgedektigi bar adamdardyń barlyq sanattary úshin qoljetimdileri:
- densaýlyq saqtaý obektileri– 152;
- bilim berý nysandary – 520;
- mádenıet nysandary– 48;
- memlekettik jáne kvazımemlekettik uıymdar – 266;
- sport nysandary – 41;
- áleýmettik qorǵaý obektileri – 10.
Birinshi toptaǵy múgedektigi bar Kókshetaý qalasynyń turǵyny Ramazan Muqataev: «Jalpy qala boıynsha múgedektigi bar adamdar úshin jaǵdaı jaqsaryp, barlyq múmkindikter qarastyrylýda. Nysan ıeleri olardy qurylys normalaryna sáıkestendirýge tyrysady. Kóptegen kásipkerler men memlekettik organdar shaǵymdar men usynystardy eskere otyryp, kirý toptaryn aıaqtaıdy. Saýda ortalyqtarynyń qoljetimdiligin qamtamasyz etý mańyzdy, endi olarǵa múgedektigi bar adamdar, ásirese kreslo-arbalarmen qozǵalatyndar kedergisiz bara alady. Mysaly, bizdiń qaladaǵy "RIO" saýda ortalyǵy. M. Ǵabdýllın atyndaǵy murajaıdyń qoljetimdilik deńgeıine jáne kóshpeli kórmelerdi uıymdastyrý múmkindikterine tań qaldym», – dep oıymen bólisti.
Budan basqa, Aqmola oblysy boıynsha halyqty áleýmettik qorǵaý salasyndaǵy retteý jáne baqylaý komıtetiniń departamenti 2025 jyldyń basynan bastap profılaktıkalyq baqylaý sheńberinde 10 jáne jospardan tys baqylaý sheńberinde 2 tekserý júrgizdi. Tekserý qorytyndysy boıynsha anyqtalǵan buzýshylyqtardy joıý týraly 9 nusqama engizildi.
Obektilerdiń menshik ıelerine profılaktıkalyq baqylaý júrgizý kezinde buzýshylyqtar alǵash ret anyqtalǵan kezde olardy ákimshilik jaýapkershilikke tartpaı, olardy joıý týraly nusqamalar ǵana engiziletinin atap ótý qajet.Nusqama belgilengen merzimde oryndalmaǵan jaǵdaıda aıyppul salynatyn bolady.