Qonaev qalasynda Almaty oblysynyń ákimi Marat Sultanǵazıev bıylǵy oqý jylyn tabysty aıaqtaǵan daryndy oqýshylarmen kezdesti. Is-shara úzdik nátıjege qol jetkizgen oqýshylardy marapattap, olardyń bilim men shyǵarmashylyqtaǵy jetistikterin atap ótý maqsatynda uıymdastyryldy, dep jazady Egemen.kz aqparat agenttigi.
«Búgin 2024–2025 oqý jylyn sátti aıaqtap, zamandastarynyń ortasynan bilimimen, ónerimen tanylyp, «júzden júırik» atanǵan, oblysymyzdyń abyroıyn asqaqtatqan jas daryndarmen kezdesip otyrǵanyma qýanyshtymyn», – degen oblys ákimi Marat Sultanǵazıev bıyl oblystaǵy 483 mektepte 352 myńnan astam oqýshy bilim alǵanyn atap ótti.
Jalpy bilim sapasy 68,3%-ke jetken. Bıyl 17 myńnan astam túlek mektep bitirse, olardyń 1433-i – «Altyn belgi», 1513-i – «Úzdik attestat» ıegeri atanǵan.
Oblys ákimi muǵalimderdiń tynymsyz eńbeginiń arqasynda oqýshylardyń bilim sapasy jyl saıyn artyp keletindigin tilge tıek etti. Atap aıtsaq, 2022–2023 oqý jylynda 104 oqýshy halyqaralyq jáne respýblıkalyq deńgeıdegi bilim saıystarynda jeńimpaz atansa, ótken oqý jylynda bul kórsetkish 145-ke jetken. Bıyl bul san 160-qa deıin ósip otyr.
«Almaty oblysy – daryndy jastardyń ordasy. Muny tek oblys ortalyǵy ǵana emes, shalǵaı aýyl oqýshylary da dáleldep keledi. Astana qalasynda ótken aýyl mektepterine arnalǵan olımpıadada oblys komandasy «Eń úzdik olımpıadalyq komanda» atanyp, I jáne II oryndarǵa ıe boldy», – dedi óńir basshysy.
Is-shara aıasynda 22 oqýshy oblys ákiminiń Alǵys hatymen marapattaldy. Sonymen qatar, daryndy shákirtter daıyndaǵan Alataý qalasyndaǵy №47 orta mekteptiń fızıka páni muǵalimi Svetlana Bekmuhambetova, Esik qalasyndaǵy «Bilim-ınnovasııa» lıseıiniń geografııa páni muǵalimi Tamara Eshanova, Ile aýdanyndaǵy №38 mekteptiń quqyq páni muǵalimi Leıla Narymova, Eńbekshiqazaq aýdany Rahat №1 orta mektebiniń hımııa páni muǵalimi Nurtaı Ernazarǵa óńir basshysy alǵysyn bildirdi.
Daryndy oqýshylar qatarynda halyqaralyq olımpıada jeńimpazdary men bedeldi ýnıversıtetterdiń grant ıegerleri bar. Olardyń qatarynda Talǵar aýdany «Dana» mektebiniń oqýshysy, ekonomıka salasyndaǵy halyqaralyq olımpıadalardyń birneshe dúrkin jeńimpazy, AQSh, Ulybrıtanııa jáne Reseı ýnıversıtetteriniń grant ıegeri Jáńgir Iljanov, Esik qalasyndaǵy «Bilim-ınnovasııa» lıseıiniń oqýshysy Halel Múslim, Ile aýdanynyń ókili Bekmuhamet Aısha jáne Uıǵyr aýdanynan Ibadýllaeva Shahrızattyń esimderi aıryqsha atalady.
«Qurmetti oqýshylar! Bilim – sheksiz múmkindikke bastaıtyn jol. Izdenýden, oqýdan, jańashyldyqtan eshqashan jalyqpańyzdar. Elimizdiń bolashaǵy – sizdersizder. Árbir qadamdaryńyz tek bıik maqsattarǵa jeteleı bersin», – dep sózin qorytyndylaǵan óńir basshysy oqýshylarǵa úlken senim artyp, aq jol tiledi.
Almaty oblysy.