Úzdik omartashylar ardaqtaldy

Jumysshy mamandyq­tary jylyna oraı uıymdas­tyrylǵan baıqaýǵa aımaqtyń ár túkpirinde baldan bulaq aǵyzyp otyrǵan omartashylar kelip qatysty. Omarta ustap otyrǵan sharýalardyń qatary kóp bolǵanymen, keıingi jyldary bal arasyn asyldandyrý syndy jumystar kenjelep qalǵan. Ol týraly arashylar san ret aıtqan. Alaıda toqymdaı jeri toqsan túrli gúlge toly shyǵysta bal arasynyń babyn úıretetin mektep joqtyń qasy.

Ara – qudiretti jaratylys. Olardyń jasaıtyn alty qyrly uıashyqtarynyń ózi – jumbaq qubylys. Al ondaǵan shaqyrymnan kózge kóriner-kórinbes bal tasýy – naǵyz eńbekqorlyq. Jumysshy ara bar-joǵy 35–40 kún ǵana ómir súrse, sol ýaqyt ishinde tirnektep jınaǵan baly jarty shaı qasyqqa da tolmaıdy eken. Al omartanyń patshaıy­my bes jylǵa deıin ómir súredi.

Sóıtip, bir kúnge so­zylǵan omartashylar baı­qaýynda sheberlik saǵat­tary ótkizildi, bal tańdaýdyń san túrli joly aıtyldy. Biri hımııalyq zattar damyǵan zamanda jaq­sy bal tańdaý ońaı emes dese, endi biri ońtaıly joldaryn nusqady.

«Jaqsy bal tańdaý úshin maılyqqa bir tamshysyn tamyzyp kórýge bolady. Eger bal jaıylyp ketse, sapasyz. Qop-qoıý bolyp ornynda qalsa, esh oılanbastan satyp alýǵa bolady», deıdi ka­ton­qaraǵaılyq omartashy Valentına Kásenova.

Aıta keterligi, omartadan bal ǵana óndi­ril­meıdi. Odan basqa adam aǵzasyna paıdaly ondaǵan túrli ónim bar. Balaýyzdan bastap, gúldiń túıirshikti tozańyna deıin qoljetimdi. Perga, propolıs te myń da bir aýrýǵa em.

Is-shara sońynda qa­zy­lardyń sheshimi­men 45 jyldan beri bal shaıqap otyrǵan Igor Svırınskıı jeńiske jetip, 150 myń teńgeniń sertıfıkatyna ıe boldy. Ardager omartashy búgingi tańda 400 uıa ustap otyr.  Sondaı-aq sharada óńirdiń birqatar omartashysy aýyl sharýashylyǵy mınıstrliginiń «Eńbek arda­geri» medalimen, «Aýyl sha­rýa­­shylyǵy salasynyń úzdigi» tósbelgisimen jáne Qur­­met gramotasymen marapattaldy.

Shyǵys Qazaqstan oblysy,

Glýbokoe aýdany