Búgin Senatta 2025–2029 jyldarǵa arnalǵan «Energetıkalyq jáne kommýnaldyq sektorlardy jańǵyrtý» ulttyq jobasy aıasynda «Qazaqstan Respýblıkasynyń keıbir zańnamalyq aktilerine astanany jáne respýblıkalyq mańyzy bar qalalardy, ulttyq jobalardy damytý, kásipkerlik jáne memlekettik organdardyń fýnksııalaryn ońtaılandyrý máseleleri boıynsha ózgerister men tolyqtyrýlar engizý týraly» zańy tanystyryldy, dep jazady Egemen.kz.
Bul qujat elimizdiń energetıkalyq qýat kózderi men ınjenerlik ınfraqurylymyn jańǵyrtýǵa baǵyttalǵan. Jalpy quny 6 trln teńgeden asatyn 29 jobany júzege asyrý kózdelip otyr. Olardyń qatarynda qýaty 7,3 GVt bolatyn energııa kózderin salý men jańartý, sondaı-aq 86 myń shaqyrym kommýnaldyq jelilerdi jańǵyrtý bar. Negizgi maqsat jelilerdiń tozý deńgeıin 50%-dan tómendetý, jylý, elektr, sý berý jáne sý burý júıeleriniń senimdiligin qamtamasyz etý.
Senatorlarǵa aldaǵy jobalardy qarjylandyrýdyń negizgi tetikteri tanystyryldy. Jobalardy irikteý úderisi úsh kezeńnen turady: aldymen tehnıkalyq saraptama júrgiziledi, keıin qarjylandyrý sharttarynyń aldyn ala maquldanýy qaralady, sońǵy kezeńde ınvestısııalyq baǵdarlamalar bekitiledi. Barlyq iske asyrý úderisi ıntegrasııalanǵan sıfrlyq platformalar arqyly júrgiziledi.
Zańǵa engiziletin ózgerister osy aýqymdy mindetterdi oryndaýǵa quqyqtyq negiz qalyptastyryp, otandyq ónerkásiptiń damýyna serpin beredi. Bul óz kezeginde jumyspen qamtýdy arttyryp, ımportqa táýeldilikti azaıtýǵa jáne ekonomıkanyń ósýine jańa qarqyn berýge yqpal etedi.