Oral qalasyndaǵy 5517 áskerı bóliminde qyzmetin minsiz atqarǵan Ulttyq ulan sarbazdary joǵary bilim grantyna ıe boldy. Endi olar eldiń jetekshi joǵary oqý oryndarynda tegin bilim alady.
Áskerı bólim basshylyǵynyń aıtýynsha, granttar jaýyngerlik, tártiptik jáne oqý daıyndyǵynda úzdik nátıje kórsetken sarbazdarǵa berilip otyr. Ár sarbazdyń jetistigi kúndelikti baqylaýǵa alynyp, arnaıy jýrnaldarda tirkeledi. Júıeli túrde júrgiziletin reıtıng nátıjesi elektrondyq formatta saraptalyp, sheshim ádil túrde qabyldanady.
– Grant ıegerleri – azamattyq boryshyn abyroımen ótep, áskerı daıyndyqta joǵary kórsetkishke qol jetkizgen jastar. Bıyl osyndaı múmkindikke 21 sarbaz ıe boldy. Olar Ulttyq biryńǵaı testileýden ótpesten-aq elimizdiń bedeldi ýnıversıtetterine túse alady, — deıdi bólim komandıriniń orynbasary Dáýren Rahymbekov.
Bilim grantyna ıe bolǵan sarbazdyń biri — Ǵalymjan Kósher. Ol «Srochnık.02» baǵdarlamasy arqyly óz armandaǵan oqý ornyna túsý múmkindigine ıe bolǵan.
– Ulttyq ulanda qyzmet ete júrip, óz bolashaǵyma naqty qadam jasadym. Bul múmkindik úshin komandırlerime zor alǵys bildiremin. Men «Astana IT University» oqý ornyn tańdap otyrmyn, – deıdi qatardaǵy jaýynger.
Batys Qazaqstan oblysy