Jańaqala túlekteriniń tartýy

Jańaqala aýdanyn­da mek­tepti támam­daǵanyna 30 jáne 40 jyl tolǵan túlekter óz qara­jatyna aýdan ortalyǵynyń kire­be­ris qaqpasy mańyna «Kıiz úı jobasy» alleıasyn jasady. Al 20 jyldyq túlekteri týǵan jerge taǵzym retinde aýdan orta­lyǵy­nyń ońtústik baǵytyn­daǵy kire­beris jol boıyna sım­vo­lıka­lyq qaqpa ornatty. Jańa­qala orta mektebiniń 1985 jáne 1995 jylǵy túlekteri mektepke «Coworking» ortalyǵyn jasaqtap, ózderiniń izin basqan shákirtterge syılyq jasady.

Osynaý ádemi dástúrge aýdan ortalyǵy ǵana emes, shalǵaıdaǵy aýyl mektepteriniń túlekteri de ún qosyp jatyr. Mysaly, Jańajol aýylynyń Aıdarhan orta mektebin 40 jyl buryn bitirgen túlekter mektepke mem­lekettik rámizder syılasa, 30 jyl burynǵy túlekter «Coworking» ortalyǵyn, 20 jyl tolǵan túlekter kıiz úı tartý etken. Bulardan keıingi býyn – 15 jyl burynǵy túlekter de qalys qalmaı, 10 oqýshyǵa ulttyq kıim syılapty.

Jańaqazan aýylynda Keńes Odaǵynyń batyry Májıt Júni­sov atyndaǵy tarıhı mektep bar. Osy mekteptiń 2005 jylǵy túlek­teri «Meniń júregim Jańaqazan» atty ádemi ınstalıasııany ornatty. Al 30 jyldyq túlekter mektepke LED ekran alyp berse, 35 jyldyq túlekter mektepke sahna kıimin tartý etken.

Pıatımar aýylynyń 1985 jylǵy mektep túlekteri – segiz qanat kıiz úı syılasa, 1975 jyly mektep bitirgender mektep aýlasyna terek ekti. Al 1995 jyly bitir­gender aýyl zıratyn retke kel­tirip, qural-saıman qoıatyn sha­­ǵyn ǵımarat salyp tastady. Jaq­­­sylyq jasaýǵa jarysqan tú­lek­­terdiń qııalynda shek joq: osy­­dan shırek ǵasyr buryn mek­­tep bi­tirgender oılasa kele aýylǵa Qazaq radıosyn ornatyp qoıypty.

Birlik aýylynda Sosıalıstik Eńbek eri M.Mırmanov atynda­ǵy mekteptiń 10 jyl burynǵy túlek­teri ózderi oqyǵan bilim ordasy oqýshylaryna jazǵy sport kıimi men jabdyqtaryn alyp berse, bes jyldyq túlekter 10 metr qyzyl kilem men minber syılady.

Kópjasar aýylyndaǵy Dına Núrpeıisova mektebiniń ǵıma­raty bıyl kúrdeli jón­deý­­den ótip jatyr. Osy mek­tep­tiń bes jyl burynǵy túlek­teri mektep oqýshylaryna sport formasyn, 2015 jylǵy túlekter úzdik oqýshylarǵa bir rettik shákirtaqy syılady. Al Qyzyloba aýylynyń 40 jyldyq túlekteri mektepke kıiz úı tartý etti. Tuńǵysh tóraǵa Seıitqalı Meńdeshov aýylynyń 1968 jylǵy túlekteri mektepke tatamı matrasyn syıǵa tartsa, 1983 jylǵy túlekteri «Meniń júregim Qyrqopa» ınstalıasııasyn jańartty. 40 jylǵy túlekterdiń arqasynda tatamı tósenishin jańartyp alǵan mektepterdiń qatarynda Másteksaı aýyly da bar.

 – Bul dástúr jas urpaqqa úlgi bolarlyqtaı ıgi is. Qazaqta «Týǵan jerge týyńdy tik» degen sóz bar. Kindik qany tamǵan topyraǵyn umytpaı, alys-jaqynda júrgen azamattardyń ózi ósken aýylyna, bilim alǵan mektebine qoldaý kórsetýi – aza­mat­tyq jaýapkershiliktiń aıqyn kórinisi, – deıdi Jańaqala aýdany­nyń ákimi Alpamys Kóshkinbaev.

Batys Qazaqstan oblysy