Qazaqstannyń túrli óńirlerinde qyzmettik ıtterdiń tótenshe jaǵdaılar kezindegi tapsyrmalardy oryndaýǵa qanshalyqty daıyn ekenin aıqyndaıtyn sertıfıkattaý synaqtary sátti aıaqtaldy, dep habarlaıdy Egemen.kz TJM baspasóz qyzmetine silteme jasap.
Qyzmettik ıtter elimizdiń túkpir-túkpirinde izdeý-qutqarý jumystarynda mańyzdy ról atqara otyryp, azamattyq qorǵanys júıesiniń ajyramas bóligi bolyp qala beredi. О́tkir ınstınktiginiń, tózimdiliginiń jáne eń qıyn jaǵdaılarda áreket etý qabiletiniń arqasynda kınologııalyq eseptoptar tabıǵı jáne tehnogendik ortada adamdardy tabý mindetterin oryndaıdy.
Elimizdiń ártúrli aımaqtarynda qyzmettik ıtterdiń tótenshe jaǵdaılar kezinde áreket etýge daıyndyǵy arnaıy sertıfıkattaý synaqtary arqyly tekserilip, sátti aıaqtaldy.
Aqmola oblysynda nemis ovcharkasy Dıgger jáne belgııalyq ovcharkalar Aksel men Gera synaqtardan súrinbeı ótti. Bul ıtter men olardyń kınologtary barlyq tapsyrmalardy tıimdi oryndap, «A» sanatyndaǵy operasııalarǵa qatysý quqyǵyna ıe boldy.
Almaty oblysy men Almaty qalasynda Eıs, Lada, Alfa esimdi belgııalyq ovcharkalar men Arlan atty nemis ovcharkasy joǵary izdeý qabiletteri men kınologtarymen ózara jumys úılesimdiligin kórsetip, synaqtan sátti ótti.
Shyǵys Qazaqstan oblysynda tórt kınologııalyq top sertıfıkattaýdan ótip, Hıt, Mıllenıým Star, Istochnık Schastıa Kıantı jáne Istochnık Schastıa Vıllıngton esimdi labradorlar naqty jaǵdaıǵa uqsas ortada — úıindiler men kedergiler arasynan zardap shekkenderdi tabý tapsyrmasyn oryndady.
Jetisý oblysynda TJD jedel-qutqarý jasaǵy bazasynda kedergilerden ótý, orman men qıraǵan ǵımarattarda izdeý jattyǵýlary ótti. Barlyq ıtter men kınologtar joǵary daıyndyq deńgeıin kórsetip, operasııalarǵa qatysýǵa laıyq dep tanyldy.
Batys Qazaqstan oblysynda Djessıdiń qyzmettik ıti barlyq tapsyrmalardy tolyq jáne sapaly oryndap shyqty.
Qyzylorda oblysynda Rapıta men Iаra atty belgııalyq ovcharkalar jáne Kodı esimdi golden-retrıver tyńdaý men ıkemdilikke qatysty jattyǵýlarda joǵary nátıje kórsetip, «A» sanatyna sáıkes keletinin dáleldedi.
Qostanaı oblysynda eki top tabıǵı jáne jasandy ortada úzdik nátıje kórsetip, barlyq kezeńnen tabysty ótti.
Mańǵystaý oblysynda nemis ovcharkasy Germes pen belgııalyq ovcharka Naıza joǵary daıyndyqtaryn kórsetip, synaqtan súrinbeı ótti.
Pavlodar oblysynyń Ekibastuz qalasyndaǵy jedel-qutqarý jasaǵynda Radı men Santı atty jas ıtter alǵash ret synaqqa qatysyp, barlyq kezeńde úılesimdi jumys kórsetip, senimge ıe boldy.
Shymkent qalasynda labrador-retrıver Berta, belgııalyq ovcharka Eva jáne Archı esimdi ıttermen jumys isteıtin eseptoptar da ózderiniń kásibı daıyn ekendigin dáleldep, sertıfıkat aldy.
Bul synaqtar kınologııalyq eseptoptardyń qutqarý jumystaryndaǵy kásibı deńgeıin taǵy bir márte kórsetti. Bul ıtter — tótenshe jaǵdaı týyndaǵanda alǵashqy kómekke keletin, adam ómirin saqtaýǵa arnalǵan mańyzdy qural bolyp otyr.
Olar — ýaqytpen jarysa áreket etetin, kóptegen adam ómirin qutqarýǵa úles qosqan naǵyz tórt aıaqty batyrlar.