Keshe Ortalyq kommýnıkasııalar qyzmetinde «Úlken el – úlken otbasy» Qazaqstan halqy Assambleıasynyń aýqymdy jobasyn ázirleý jáne júzege asyrý jóninde» baspasóz máslıhaty ótti. Oǵan Qazaqstan halqy Assambleıasy Keńesiniń múshesi, ekonomıka ǵylymdarynyń doktory Anatolıı Bashmakov, Prezıdent janyndaǵy «Qoǵamdyq kelisim» respýblıkalyq memlekettik mekemesiniń dırektory Natalıa Kalashnıkova jáne osy mekeme dırektorynyń orynbasary Ǵazız Telebaev qatysty.
Atalmysh jobany júzege asyrýǵa belsendi atsalysyp jatqan «Qoǵamdyq kelisim» mekemesiniń ókilderiniń aıtýynsha, sharany halyqtyq jobaǵa aınaldyrý tásilderi Mádenıet jáne sport mınıstrligimen kelisilip talqylanyp jatyr. Bul sharaǵa elimizdegi 900 etnomádenı birlestik qatysady. Osy jóninde Prezıdent janyndaǵy «Qoǵamdyq kelisim» RMM dırektory Natalıa Kalashnıkova: «Úlken el – úlken otbasy» uzaq merzimdi joba. Qazirgi ýaqytta bul jobanyń josparyna engiziletin sharalar jónindegi máseleler talqylanýda. Olardyń birnesheýin atap óteıin, «Qazaq halqyna jəne bir-birimizge alǵys kúni», əleýmettik kómek kórsetýge baǵyttalǵan «Qaıyrymdylyq kerýeni» jáne «Jibek jolyn» zertteýge baılanysty úlken jobalar. Bul jobalardyń barlyǵy sáıkesinshe qarjylandyrylady. Al bir ereksheligi oǵan etnomədenı ortalyqtar men QHA-nyń qoǵamdyq bólimsheleriniń jetekshileri de tartylady, – dedi. Aýqymdy joba aıasynda jyl sońyna deıin 12 joba iske asyrylatyndyǵyn aıtqan ol: «Onyń birinshisi – 6-7 tamyz kúnderi ótetin Medıasııa ortalyǵynyń keńeıtilgen otyrysy. Aldaǵy ýaqytta QHA bastamasymen atalmysh alańda Halyqaralyq medıasııa ortalyǵyn qurý josparlanýda, – dedi. Aıta keteıik, «Úlken el – úlken otbasy» jobasyn Elbasy «100 naqty qadamnyń» 86-shy qadamynda tapsyrǵan bolatyn. N.Kalashnıkovanyń aıtýynsha, bul joba halqymyzdyń birtektiligin qalyptastyrýǵa baǵyttalǵan. Odan keıin sóz alǵan «Qoǵamdyq kelisim» RMM dırektorynyń orynbasary Ǵazız Telebaev: «Bárimiz bir uıym retinde uıysyp, ujymdasyp, bir-birimizdi baýyr retinde qabyldasaq, sonda ǵana biz úlken otbasy bola alamyz. Úlken otbasynda bári birin-biri syılaıdy, qurmetteıdi. Ol derbes ınstıtýt bolady. Onyń basty mindeti – belgili bir qaıshylyqtar men daý-damaılardy boldyrmaýdyń quraldary men tetikterin izdeý. Biz qazir qarama-qaıshylyqtar týyndaǵan jaǵdaıda olardy sheshe alatyn aqsaqaldar keńesin qurýymyz qajet. Sonymen birge, biz «Qazaqstan ensıklopedııasy» ınternet portalyn ashýmen qatar, elimizdiń óńirlerinde etno-aýyldar qurýdy jáne Ulttyq mýzeıden «Qazaqstan kóp ulttylyǵynyń tarıhy», «QHA tarıhy» zalyn ashýdy da kózdep otyrmyz», – dedi.
Raýshan TÁÝIRHANQYZY, jýrnalıst.