Elimizde kásibı jáne buqaralyq sport – eleýli basymdyqtyń biri. Bul týraly Memleket basshysy: «Ult densaýlyǵyn bekemdeý máselesi de óte ózekti. Barlyq jas sanaty arasynda buqaralyq sport túrlerin nasıhattaı berý kerek. Balalar úshin sporttyq ınfraqurylymnyń barynsha qoljetimdi bolýyn qamtamasyz etý kerek. Buqaralyq sportty damytý pıramıdaǵa aınalýy qajet. Onyń basyna chempıondar shyqsa, onyń negizinde saý ári sanaly urpaqty, myqty ultty qalyptastyramyz», degen edi. Osy baǵytta Prezıdent tapsyrmasymen «Dene shynyqtyrý men buqaralyq sportty damytý jónindegi 2020–2025 jyldarǵa arnalǵan keshendi jospar» ázirlenip, Úkimet qaýlysymen bekitildi. Bul jospar óńirlerde kezeń-kezeńmen júzege asyp jatyr.
Mańǵystaý oblysy Jańaózen qalasy da sport salasyna aıryqsha kóńil bólip, aýylda, qalada balalar oınaıtyn alańshalar, vorkaýttar, jańa sporttyq keshender ashyp, jurtshylyqty qýantyp keledi. Jalpy, jańaózendikterdiń sportqa degen betburysy eleýli. Buryndary sportpen negizinde jastar shuǵyldanatyn bolsa, keıingi kezderi stadıonda, sport alańdarynda úlken kisiler tańnan jattyǵý jasap júrgenin jıi kóretin boldyq. Bul – el salamattylyǵyndaǵy sabaqtastyqtyń jaqsy nyshany.
Taıaýda Ámın Tuıaqov atyndaǵy ortalyq stadıonda respýblıkalyq sport festıvali ótti. Jańaózende ótken tuńǵysh festıval dzıýdo, grek-rım, erkin kúres oıyndaryn qamtydy.
Festıvalǵa 12 óńirden 600-den astam sportshy qatysyp, atalǵan sport túrlerinen baq synady. Jarys el birligi men otanshyldyq deńgeıdi kórsetti. Sonymen qatar 16–17 mamyrda Qazaqstannyń eńbek sińirgen jattyqtyrýshysy, munaıshy Jeńis Jarylǵapulyn eske alýǵa arnalǵan eresekter arasyndaǵy III respýblıkalyq ashyq týrnırdiń fınaly ótti. Sharaǵa Astana, Almaty, Atyraý, Aqtóbe óńirlerinen jáne kórshiles Reseı Federasııasy Bashqurtstan, О́zbekstan, Ázerbaıjan elderinen boksshylar qatysty. Bir mándi oqıǵa: fınaldan soń, kórermender úshin kásibı bokstan arnaıy kezdesý uıymdastyryldy. Rıngke jerlesimiz, jańaózendik sportshy Ýálıhan Bısenqulov pen kamerýndyq kásipqoı boksshy Krıstıan Výapı shyqty. Asa tartysty jekpe-jekte aıqyn basymdyqpen Ýálıhan Bısenqulov jeńdi.
El tarıhyna enetin sporttyq is-sharalardyń Jańaózen qalasynda uıymdastyrylýy óńir jastaryn yntalandyryp, jurtshylyqty serpiltip tastady. Árıne, birinshi kezekte buǵan sebepshi – Jańaózen qalasy ákimdiginiń sportqa degen memleketshil jaýapty kózqarasy. «Jas kelse – iske» demekshi, «Jańaózen – sportshylar qalasy» degen urandy sózben emes, naqty ispen dáleldep júrgen Janseıit Qaınarbaevtyń eńbegin erekshe atap ótkimiz keledi. Aldaǵy ýaqytta súıikti qalamyz Jańaózende myqty bapkerlerden dáris alǵan olımpıadanyń kúmis júldegeri Ádilbek Nııazymbetov, Eýropa chempıony Bekzat Nurdáýletov sekildi talaı álem tanıtyn jeńimpazdar shyǵatynyna senimdimiz.
Asqar NOǴAEV,
Jańaózen qalalyq máslıhatynyń depýtaty