Bıyl adamzat balasynyń tarıhyndaǵy zardaby men qasireti óte aýyr, eń qanquıly Ekinshi dúnıejúzilik soǵystaǵy Jeńiske 80 jyl toldy. Nemis basqynshylaryna qarsy kúreste Qazaqstannyń qosqan úlesi ushan-teńiz. Soǵysta atylǵan árbir on oqtyń toǵyzy elimizde shyǵarylsa, árbir besinshi otandasymyz maıdanǵa attandy. Sol maıdangerlerdiń ózi búginde azaıyp barady. Alaıda erligi elge mura, urpaqqa uran bolǵan asyl jandar sanadan syzylyp, oıdan óshpeýge tıis.
Bizdiń Panfılov aýyldyq okrýgi aqsaqaldar keńesiniń bastamasymen Panfılov aýylynda UOS ardagerlerine eskertkish ornatý erte kóktemde qolǵa alynyp, 9 mamyr Jeńis kúninde ashyldy. Bul eskertkish-taqtada Panfılov, Arqabaı, Túzýsaı aýyldarynan soǵysqa qatysyp, beıbit ómirde eńbek etip qaıtys bolǵan 178 jerlesimizdiń aty-jóni jazyldy.
Osy tizimniń ishinde Qudaıbergen Janserikov soǵysta kórsetken erlikterine saı eki ret Keńes Odaǵynyń batyry ataǵyna usynylyp, ala almaı qalǵan. Bul maıdangerge Panfılov aýylynan kóshe berildi. Jeńistiń 80 jyldyǵyna oraı eki maıdangerge kóshe ataýyn berý týraly aýdan ákiminiń atyna usynys berildi. Osy eskertkishtiń ornatylýyna demeýshilik jasaǵan kásipkerler men jalpy jurtshylyqqa rızashylyǵymyzdy bildiremiz.
Maıdangerlerdiń esimi qashalyp jazylǵan eskertkish janynda «Erlik – elge mura, urpaqqa uran» atty saltanatty jıyn ótti. Is-sharanyń ashylý rásiminde Almaty oblysynyń qurmetti azamaty Nurseıit Qudyqov, Panfılov aýyldyq okrýginiń ákimi Dýlat Daýletalıev, ákim orynbasary Saýle Myqtybaeva, Panfılov aýyldyq aqsaqaldar keńesiniń múshesi Sýltan Nızamov lebizin bildirdi. №33 orta mektep ujymy konserttik baǵdarlama usyndy. Is-shara sońynda qonaqtar men aýyl turǵyndary eskertkishke gúl shoqtaryn qoıdy. Gúl shoqtary Panfılovtyń da bıýstine qoıylyp, qurmet kórsetildi.
Osyndaı taǵylymdy is-shara okrýg aýmaǵyndaǵy Jibek Joly, Qarabulaq, Tóńkeris aýyldaryndaǵy maıdangerlerge arnalǵan eskertkishterdiń de janynda ótti.
2024 jyldyń aqpan aıynda №17 orta mektepte ótken basqosýda Jeńistiń 80 jyldyǵyna daıyndyq týraly áńgime qozǵalǵan edi. Jıynda ǵalym, professor Leıla Ahmetova men QHA múshesi, etnomedıator Jumaqyz Butabaeva bizdiń eskertkish ornatý týraly usynysymyzdy qoldap, jobaǵa qosqan edi. Osy kisilerdiń uıytqy bolýymen ardagerlerdiń aty-jónderin naqtylap, tizimge qosý jumystaryn bastap kettik. Birlesip atqarǵan jumystyń nátıjesinde burynǵy eskertkishtiń jalǵasy retinde jańa eskertkish ornatyldy.
Batyr babalarymyzdyń qaharmandyq rýhy urpaqtan-urpaqqa ónege bolady dep sanaımyz. Erlik eshqashan umytylmaıdy.
Abaı JURYNOV,
Panfılov aýyldyq aqsaqaldar keńesiniń tóraǵasy
Almaty oblysy,
Talǵar aýdany