Elimizdiń túkpir-túkpirinde bilimge qushtar, talaby taýdaı jastar ósip keledi. Túrli olımpıadalardan oza shaýyp, jetistikke jetip júrgen daryndy oqýshylardy jıi kezdestiremiz. Olar – bolashaqtyń shamshyraǵy, el úmitin arqalaǵan jas býyn. Zamanaýı oqýshy tek sabaq úlgerimimen ǵana emes, jańashyl ıdeıalarymen, álemdik bilim keńistigine umtylysymen erekshelenedi. Sonyń jarqyn mysaly retinde sheteldik ýnıversıtetterden jappaı shaqyrtý alǵan eki talapty túlek – Aqjúnis Atahan men Aısultan Altynbekti atap ótýge bolady.
Saryaǵash aýdanyna qarasty №7 Tóle bı atyndaǵy jalpy bilim beretin mekteptiń 11-synyp oqýshysy Aqjúnis Atahan álemniń 36 bedeldi ýnıversıtetinen oqýǵa shaqyrtý aldy. Naqtyraq aıtsaq, ol AQSh, Kanada, Túrkııa jáne Malaızııadaǵy joǵary oqý oryndaryna qujat tapsyrǵan. Onyń ishinde Amerıka Qurama Shtattarynyń – 17, Dýbaıdyń – 5, Túrkııanyń – 6, Malaızııanyń – 5 ýnıversıteti oǵan arnaıy grant usynsa, Kanadanyń bir ýnıversıteti prezıdenttik stıpendııamen oqýǵa qabyldaǵan. Ulttyq biryńǵaı testileýde 111 ball jınaǵan Aqjúnis qazir halyqaralyq qatynastar mamandyǵyn tańdap otyr. Ol aldaǵy ýaqytta halyqaralyq deńgeıde bilim alyp, el damýyna óz úlesin qosýdy maqsat etedi.
Al Arys qalasyndaǵy «Bilim-ınnovasııa» lıseıiniń oqýshysy Aısultan Altynbektiń jetistigi tipten aýqymdy. Ol álemniń 86 ýnıversıtetinen shaqyrtý alyp, jalpy quny 4,6 mıllıon dollardy quraıtyn grant jeńip aldy. AQSh, Ulybrıtanııa, Majarstan, Germanııa, Ońtústik Koreıa, Aýstralııa syndy elderdegi jetekshi oqý oryndary Aısultannyń bilimine joǵary baǵa bergen. Atap aıtar bolsaq, «Budapest University of Technology and Economics», «Eötvös Loránd University», «University of East London», «Albion College», «Hampshire College», «Drexel University», «DePaul University», «CU Boulder» (University of Colorado Boulder), «Drake University», «Temple University» syndy oqý oryndarynyń arystyq túlekke tańdaýy túsken. Bul joǵary oqý oryndary ǵylym, tehnologııa, bıznes jáne áleýmettik ǵylymdar salasynda aldyńǵy qatarda. Al jas túlektiń armany – IT salasynda eńbek etip, qazaq tilinde saıt jasap, shetelde oqyǵysy keletin aýyl balalaryna jol kórsetý. Bul platformada shetelge oqýǵa túsý, qujat jınaý, testke daıyndyq týraly mańyzdy aqparattar memlekettik tilde beriledi.
Aqjúnis pen Aısultan – ustaz eńbeginiń, ata-ana meıiriminiń jáne ózderiniń qajyrly talpynystarynyń arqasynda bilim-bilikteriniń halyqaralyq deńgeıde joǵary baǵalanatynyn dáleldedi. Olar erteńgi kúni elge oralyp, alǵan bilimin týǵan jer ıgiligine jumsaıtyn azamat bolyp ósedi degen senim mol.