Bıdaıyq aýylynyń turǵyny Ǵalııa Otarbaeva biraz ýaqyt buryn «Aýyl amanaty» baǵdarlamasy aıasynda 9 300 000 teńge jeńildetilgen nesıe rásimdep, oǵan 30 bas iri qara mal men 10 tonna shóp azyǵyn satyp aldy. Sıyr saýýǵa arnalǵan apparatty alýǵa jeke qarjysyn jumsaǵan. Osylaısha, tıimdi memlekettik qoldaý nátıjesinde berekeli kásipke belsene kirisken edi.
Satyp alǵan iri qara bıyl ekinshi jyl buzaýlady. Tańǵy jáne keshki altyda 30 sıyrdy saýyp, sút ónimderin daıyndaıdy. Sútin tartyp, qaımaǵyn alyp, maıyn shaıqap, saýdaǵa shyǵarady. Shyqqan kók sútinen aq irimshik, sary irimshik jasap, qurt qaınatady. Sarymaıdyń kılosy 6–6,5 myń teńge bolsa, súttiń bir lıtriniń baǵasy 180–200 teńge aralyǵynda.
Ǵalııanyń úıi Qyzylorda – Pavlodar tasjolynyń irgesinde ornalasqan. Bul da saýdanyń sátti júrýine sebepshi. Dámin tatyp, qyzyǵýshylyǵy artyp, turaqty klıentine aınalǵan tutynýshylar qanshama.
Otbasynyń uıytqysy bolyp otyrǵan Ǵalııa Amantaıqyzy bizben áńgimesinde «Erinbeı eńbek etken adamǵa ǵana qut qonyp, yrysy artady» dedi. Tórt bala ósirgen ana ulyn uıaǵa, qyzyn qııaǵa qondyrǵan. Olardan taraǵan segiz nemeresi bar. Qolyndaǵy uly men kelini kásibine qolǵabys etedi. Kásip ıesiniń jospary da aýqymdy. Aldaǵy ýaqytta mal basyn arttyryp, sharýashylyq aıasyn keńeıtsem degen nıeti bar.
Ulytaý oblysy,
Jańaarqa aýdany