Memlekettik qoldaý sharalarynyń, dıqandar men jergilikti ákimshiliktiń úılesimdi jumysynyń arqasynda Qazaqstanda bıyl egis der kezinde júrgizilip, tolyq aıaqtaldy, dep jazady Egemen.kz.
Aıta ketken jón, bıyl egis jumystaryn qarjylandyrý (700 mlrd teńge) alǵash ret dala jumystary bastalǵanǵa deıin alty aı buryn bastaldy.
Dıqandardyń jeńildetilgen qarjyǵa qoljetimdiligin arttyrý maqsatynda qaryz somasynyń 85%-na deıin kepildik berý mehanızmi iske qosyldy.
Sala mınıstrliginiń baspasóz qyzmetiniń málimdeýinshe aýyl sharýashylyǵy tehnıkasyn jeńildetilgen lızıng arqyly alý kólemi 250 mlrd teńgeni qurady. Bul mashına-traktor parkin jańartýǵa jáne kóktemgi dala jumystaryn agrotehnıkalyq merzimderde, joǵary tehnologııalyq tıimdilikpen júrgizýge eleýli áser etti.
Aldyn ala málimetterge sáıkes, aýyl sharýashylyǵy daqyldary 23,7 mln gektar jerge ornalastyryldy. Sonymen qatar, egistik alqaptardyń qurylymyn ártaraptandyrýǵa erekshe nazar aýdaryldy. Bul rette egin aınalymynyń ǵylymı negizdelgen normalary, klımattyq táýekelderge tózimdilik jáne naryqtyq úrdister eskerildi.
Nátıjesinde ónimdiligi joǵary jáne suranysqa ıe daqyldardyń egis kólemi ulǵaıdy: maıly daqyldar – 3,4 mln gektar (ótken jylmen salystyrǵanda 0,5 mln gektarǵa artyq), mal azyqtyq daqyldar – 3,3 mln gektar (114 myń gektarǵa artty), dándik júgeri – 167,5 myń gektar, kókónis-baqsha daqyldary – 222,3 myń gektar.
Atalǵan egis alqaptary eldiń ishki qajettilikterin qamtamasyz etip qana qoımaı, agroónerkásiptik keshenniń eksporttyq áleýetin arttyrýǵa múmkindik beredi.