Qaraǵandy oblysynda turmystyq zorlyq-zombylyq deregi tergelip jatyr. Jábirlenýshi taraptyń aıtýynsha, bul iske burynǵy polısııa qyzmetkeri qatysy bar. Kúdikti ázirge bostandyqta júr, alaıda is baqylaýǵa alynǵan, dep habarlaıdy Egemen.kz.
Oqıǵa 4 mamyrǵa qaraǵan túni Balqashta bolǵan. Jábirlenýshiniń týystarynyń sózinshe, onyń burynǵy kúıeýi úıge basa-kóktep kirip, áıelge shabýyl jasaǵan — uryp-soǵyp, qylqyndyra bastaǵan.
Áıel kóp jaraqat alyp, aýyr hálde aýrýhanaǵa jetkizilgen.
Týystarynyń aıtýynsha, oqıǵadan keıin er adam birneshe ret áıel jatqan medısınalyq mekemege kelip, ony qorqytýdy jalǵastyrǵan.
Qaraǵandy oblysynyń polısııa departamenti bul derekke qatysty qylmystyq is qozǵalǵanyn rastady. Kúdiktiniń rasynda burynǵy polısııa qyzmetkeri ekeni naqtylandy. Ol anyq-qanyǵyn bilý úshin bólimshege jetkizilgen. Dese de polısııa ókilderi jábirlenýshi taraptan resmı aryz tek 4 maýsymda, ıaǵnı oqıǵadan bir aı ótken soń ǵana túskenin aıtty.
Aldyn ala málimet boıynsha, shabýyl burynǵy erli-zaıypty arasyndaǵy múlik daýyna baılanysty bolýy múmkin.
Polısııa ókilderi tergeý barysyna kúdiktiniń jeke basynyń áser etpeıtinin basa aıtty: “Zań barlyǵyna birdeı. Burynǵy qyzmettik mártebe jaýapkershilikten bosatpaıdy”, — dedi departament ókilderi.
Qazir is oblystyq polısııa basshylyǵynyń erekshe baqylaýynda. Sotqa deıingi tergeý amaldary júrip jatyr.